الزومبي وأفلام الخيال
بابكر سلك
*هوليود ليست مجرد مدينة إنتاج إعلامي
*هوليود “ست ودع”
*تكشكش وترمي
*وتحكي لينا
*تاني أخوهو زعلان شديد
*وتاني أخوهو سياسيًا هو القوة العظمى التانية
*روسيا
*الآن طبعًا “الودع” كلو يتحدث عن “الوحيد”
*الوحيد البمشي بعيد وبرجع شايل دولارات حارّة من الفرن
*الوحيد بقى يحكم العالم منفردًا
*والمشكلة إنو بخذلك ويجبرك تغني
*الوحيد خلاني وحيد
*”ست الودع” تكشكش وترمي
*هوشة حريم ونعمة كريم
*وهوشة الحريم طبعًا مخيفة
*الحريم لو اتلمن تحت عنقريب، بقومن بيهو
*بودن الآخرة عديل
*وهوشة الحريم في “لغة الودع العالمية”
*ما هي إلا “جامعة الدول العربية“
*يتلمن الدول حول عنقريب قضية
*ويودّن الآخرة
*ويقعدن يسكلبن
*ها هنّ متلملمات حول عنقريب غزة
*ولا يفعلن شيء سوى لطم الخدود والثكلى ويعددن مآثر “سيد العنقريب”
*يبكنو قبل يموت
*هوشة الحريم في “لغة الودع السياسي العالمي” ليست سوى نذير شؤم
*وتكشكش وترمي
*”ود الصرة”
*ده كمان قصته قصة
*ود الصرة، أب صرة برّه
*ما قادر يستر صرتو
*”الودع العالمي” مصطلحاته تجنّن
*وودع هوليود ما بيحمد إلا “الوحيد”
*جاياك دولارات وطيارة بالطيارة
*و”الوحيد” هو الوحيد المستفيد من الجهل اللي مخلّي كل العالم حول “ست الودع” بهوليود
*الخوف والجهل هما أساسيات السيطرة على العقول والقلوب
*”ست الودع” تكذب واقعًا
*لا لتُصدّقها هي
*ولكن لتخلق منك عقلًا لا يصدّق شيئًا
*وتدفعك لتسأل عن أمور إن تبدُ لك تسُؤك
*عشان تزيدك خوف من مجهول، وجهل بواقع تعيشه
*وتبقى عليك قصة الزول السأل خضر بشير عن معنى كلمة “الحلوك” الواردة في (في غيهب الليل الحلوك)
*خضر بشير قال ليهو: “إنت عرفت (غيهب) عشان تسأل عن الحلوك؟”
*ونجلس جميعًا القرفصاء حول “ست الودع” في ليلها الحلوك ولا ندري ما هو “الغيهب”
*دايرنّا كده
*كيف يجهلوك؟
*ما بيجهلوك
*دايرين يجهلوك (بكسر الياء وفتح الجيم وكسر الهاء)
*المهم
*”ست ودع هوليود” تخبرنا عن مجهول عن طريق أفلام خيال علمي
*ويبقى الأمر واقعًا بعد حين
*لكنه واقع أعدّونا له إعدادًا جيدًا للخوف منه
*زي الروبوت
*كان شخصية خيالية بأفلام الخيال العلمي
*فأضحى واقعًا نصيبنا منو الدهشة
*والآن يتم عرض أفلام الزومبي على خشبة وشاشة هوليود
*ما في حل معاه
*ما بيموت
*عندما يموت الوعي
*لا يموت الزومبي
*يعضّيك تبقى زومبي طوالي
*عضّ العالم كلو
*العالم كلو بقى زومبي
*وللأسف
*الزومبي عضّ زول في المريخ
*بقى زومبي كبير
*ولمّ ليك في الناس عضّ
*الآن عندنا زومبيات كتااااار
*أي شنكبة عنكبة يعضوك
*وتبقى زومبي معاهم، تضيّ غيرك وتقلبو زومبي
*عدم الوعي وسواقة الخلا
*هما الجو المناسب للزومبي
*وعضّيني، حاول حِس بي، وارمي اللوم عليّ
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*كلنا زومبي بقينا
*زومبيات السياسة يوميًا يعضن فينا
*وزومبيات الاتحاد يقرمشن فينا
*وزومبيات السوق ماصّين الدم الفينا
*البلد كلها زومبيات يا والينا
*نعضّيك ولا تعضّينا يا والينا
سلك كهربا
ننساك كيف، والكلب قال: أخطر زومبي في هوليود هو “زومبي البوكلين التنفيذي”، عضّتو بتودي طوالي
وإلى لقاء
سلك
