بابكر سلك
لا زلنا نتابع كأس العالم للأندية.
وبرضو بنتابع كأس النخبة بتاعنا.
ما حدش أحسن من حد.
والمقارنات تفرض نفسها علينا.
بدءًا من التصوير.
لأنو في مباريات كأس العالم للأندية، لو المباراة استمرت أربعة أشواط:
لا بملص النظارة وأنضفها.
لا برمش.
لا عيوني بتدمع.
أول ما أمشي على نخبتنا:
أول شي بشك في النظارة.
غبشة ما عادية.
أقرب أَجلَخ العدسات بحجر نار.
شككونا في عيوننا.
وتأتي المقارنات فارضة نفسها علينا.
ياخ العالم ده كلو ما فيهو كورة بتطلع دخان…
إلا كورتنا في عطبرة.
الباص الأرضي (إن وجد)، تلقى الكورة جارية مدردقة ووراها طالع دخان مباريها لحدي الجهة البتوصلها.
كورة زي الموتر…
تلقاها مفحطة ووراها الدخان حبل.
استادات النخبة ما مشكلة.
عطبرة والدامر ما مشكلة.
ما عندهما ذنب.
المشكلة هي المشكلة.
هي الفساد الإداري دومًا في كل مجالاتنا:
سوء الإدارة.
ضعف الإرادة.
الكنكشة في المناصب.
عطبرة والدامر تستحقان التكريم والاحتفاء.
استادات وجماهير.
لأنهما قبلن بضم الفعاليات (عدي من وشك).
ومدن رجليهن أكثر من لحافهن كرمًا وإكرامًا وضيافة.
الشعب قيافة.
دومًا الشعب كلو قيافة.
بس ما محظوظ.
ربنا دايمًا بسلط عليه قيادات تحيّر.
في كل المجالات.
ويدفع الثمن براهو.
القصة دي ذكرتني بصاحبنا ربنا يهديه:
بتاع سَنَة (بكسر السين).
يمشي يوميًا يتجوغر ويجينا.
الليل كلو يقعد فينا، يلغلغ وما بدي زول فرصة يتكلم.
تفتح الموضوع إنت؟
ما بخليك تتمو.
يلفحو ويتمو هو، حتى لو ما فاهم فيه شي.
عذبنا عذاب شديد.
صاحبنا التاني القصة دي ضايقتو بقى ما بجينا.
قلت ليه: انقطعت مالك؟
قال لي:
“صاحبك ده جننا جن… كرهنا الونسة ذاتها… ما معقول هو يشرب وربنا يحاسبنا نحنا!”
وده الحاصل لينا كشعب:
الإداريون يقيفوا غلط وربنا يحاسبنا نحنا.
بلد تضيع.
ملاعب تخجل.
مستوى يومي راجع لي ورا.
وصراع على المناصب.
كورة بتطلع دخان؟؟؟
حيرتونا والله.
المهم…
بسوء الإدارة العندنا، بدءًا من الدولة ونزولًا للوزارات والاتحادات وحتى إدارة الأسرة، طموحنا عالي خلاص.
زي الطالب الممتحن الشهادة:
لا بمشي مدرسة.
لا بذاكر.
لا عندو كراس.
لا فتح كتاب.
ويوم النتيجة يفتح الراديو متوقع يسمع نفسو مع العشرة الأوائل.
كل سنة نحلم بالأميرة السمراء.
جادين.
رغم السوء وعدم المواكبة والجاهزية.
دايرين نتفوق على أندية مصر وتونس وجنوب أفريقيا وكل القارة ونظفر بالأميرة.
ما بهمنا مقارنة بين ملاعبنا وملاعبهم، ولا اهتمامهم بالاستراتيجيات الممنهجة علميًا.
الأهلى القاهري شغال:
عامل اختبارات للناشئين من مواليد 2010 حتى 2019.
الاختبارات في كل محافظات الجمهورية.
عندهم أكاديميات تعمل في كل المحافظات ولكل الفئات السنية.
ونحنا دايرين نحلم ببساطة بالأميرة السمراء.
ياخ ده كله خليهو…
الأهلي بعد كأس العالم للأندية أخذ إجازة أسبوعين.
بعدها ماشي تونس لإقامة معسكر إعدادي للموسم الجديد.
حدد خلاله ثلاث مباريات تجريبية مع أندية تونسية بينها الترجي.
وحدد حتى مواعيد تلك المباريات الإعدادية.
ونحنا ساكين الكورة أم دخان، ودايرين نشيل الأميرة السمراء ونلعب في كأس العالم للأندية.
ياخ الهلال ما قادر يجيب محترفين السودان.
والأهلي حدد حتى وجبات الإعداد والعصائر.
ونحنا ناس خالد عزالدين حلمانين يتخطوه، وناس محمد عبدالماجد حايفقعونا بحديثهم عن التحكيم الأفريقي الذي ينحاز للأهلي ويظلم الهلال.
نقعد في بلدنا، في المناطق الآمنة، ونسك كورتنا أم دخان دي…
ونقفل خشومنا دي…
إلى أن يكرمنا الله بإدارة وطنية همها رفع شأن الوطن والمواطن.
أيها الناس
إن تنصروا الله ينصركم.
*أها
*نجي لي شمارات والي الخُرتوم
*كان شُفت يا والينا
*دايرين ربنا يغيِّر الحال الفينا
*وربنا ما حايغيِّر إلا نغيِّر المنكرات بايدينا
*أو بالسِنتنا الفينا
*أو بقلوبنا الماتت يا والينا
سلك كهربا
ننساك كيف، والكلب قال: “سوء الإدارة وضعف الإرادة، وكتل الديك وخم بيض الجدادة هو المشكلة”… اكتلوا الزول الكتَل الكلب.
وإلى لقاء
سلك
