بقي طارد أقلبوهوا عطارد

بابكر سلك

أمس كانت مباراتنا ضد مريخ التبلدي
كالعادة
مريخ الزمن الحالي
مابفرحك طوالي
مباراة أهلي مدني ما كان فيها كورة
لكن كان فيها بعض الروح
جات كورة التبلدي
لاكورة لا روح
وياروح مابعد روح
عدم الروح ده زمان
خلاني كتبت بعنوان
اشطبوا الدافي واقلبوهوا ثقافي
لأن عبدالكريم الدافي وقتها كان يلعب بروح
الوحيد الذي يقاتل
اسي نقول اشطبوا منو عشان تقلبوهوا شنو؟؟؟
زول نستثناهوا مافي
لذا كان العنوان يحكي عن الحال
بقي طارد اقلبوهوا عطارد
واهو مامشينا بعيد
المريخ وعطارد والزهرة كل في فلك يسبحون
وجابت ليها مرقوت كمان
قصة غريبة تجوب الأسافير مفادها أن أجانب المريخ يعانون (المرقوت)
وأن ناس الفندق قالوا قبل حلول المريخ ما كان في مرقوت
في اعتقادي أن الموضوع شكل من أشكال الحرب
والغريبة اعتدنا على الحرب بكل أنواع الأسلحة
لكن مرقوت دي جديدة لنج
ماعلينا
مادايرين ننتقد
ده ماوكتو (زي مابقولوا الناس المادايرن منطق)
لكن أليس لنا حق السؤال
الحاصل شنو؟
ولا ده برضو ماوكتو؟؟؟؟؟؟
ياخ لاعب ساي عندو غيرة مافي
زول بتزعلوا خسارة مافي
الناس ديل يا (مكتوبين) يا مامرتاحين
لعب المليون بنعرفوا
ولعب الوعود بنعرفوا
أيها الناس
ده كووولو صنيعة أيدينا
من يوم الفوضى الخلاقة داك ماقامت لينا قايمة
وإذا مارجعنا لليوم داك
واستعدلنا المسار
ما حاتقوم لينا قايمة
لكن قيامتنا حاتقوم
فعلاماتها الصغرى تحققت كلها
وبدأت العلامات الكبرى في الظهور
حقو نتوب قبل أن تجف الأقلام وترفع الصحف وقبل أن ترفع الأقلام وتجف الصحف وينفخ في الصور
ده لعب مالعب
نحنا دايرين لعب مادايرين لعب
صدقوني
العيب ما مجلس ولا لاعبين ولا طارق ولا مدرب
العيب نحنا
غياب الاستقرار بسبب الهرجلة
الكيمان وسواقة الناس بالخلا
كسر رقبة القوانين واللوائح لأجل أغراض لفئة معينة أو بسبب حرب فئة أخرى سواء بغت أو لم تبغي
العيب فينا لأننا بدل نروقها سطناها واتلايقنا ولايقناها وفركناها
والمفروكة ما بتخلي لياقتها
لذا تظل أيدينا متسخة إلى أن نجد صابونة نغسل بها درن ما اقترفته أيدينا
أيها الناس
بهذه الحالة التي نحن فيها
أخير نمثل إفريقيا ولا أخير نجي السادس ندبل مركزنا الموريتاني ونتفادى المشاركة الإفريقية؟؟؟؟؟
لم نعرف اليأس يومًا
ولكن لم نفقد العقل أيضًا
ولا حول ولا قوة إلا بالله
أيها الناس
إن تنصروا الله ينصركم
اها
نجي لي شمارات والي الخرطوم
كان شفت يا والينا
ولا خليك
الشكية لغير الله مذلة يا أخينا
كفاية الذلة الفينا

سلك كهربا

ننساك كيف والكلب قال الكورة غالب ومغلوب ودرون… انتوا زعلانين في شنو؟ هي وينا الكورة؟؟؟

إلى لقاء
سلك