بابكر سلك

*امس شفنا كورة الريال وباريس
*والله أشفقنا على الريال
*ده ما ريال
*ده لعب عيال
*في تلت ساعة أهدى باريس ثلاثة أهداف
*وقدم هدايا أكثر
*لكن باريس خجل من عطاء الريال
*ولما جاء الشوط التاني
*اقتنعنا تمامًا إن ده ما الريال
*ده لعب عيال
*دفاع الريال أمس ده أنا أقول يا ربي شايفه وين
*أنا متأكد إني شايفه
*شايفه وين شايفه وين يا ربي
*غايتو يا في موريتانيا
*يا في الليق
*يا في الدافوري
*ما متأكد وين
*لكن متأكد إني شايفه
*الريال اللي شفناه أمس ده
*أحسن ليه يجي يحصل النخبة سريع
*لكن بطريقته دي لو لعب في أي حتة في العالم ده بيتبشتن
*فريق لا استغنى عن عضم التيم
*لا شلع الكشف
*يمكن الاعتماد على أحد (أبناء النادي) هو السبب
*لكن يا الريال كان دي كورتك
*البي إن سبورت الاشتراك فيها حايقل شديد
*بعكس باريس
*فريق ما بتقدر تفضل فيه نجم على نجم
*كلهم ديمبلي
*عشرة على عشرة
*وفي الآخر الشغل شغل مدرب
*لكن في الأول الشغل شغل إدارة واعية
*عارفة هي دايرة شنو
*وضعت خطتها بحسب إمكاناتها
*وجابت المدرب البقدر يقود المشروع
*ووفرت له مساحة من الحرية
*استغنى عن الداير يستغنى عنه
*وسجلوا ليه البرغب فيه
*زرعوا وحصدوا
*صبروا وظفروا
*لدرجة إنهم بقوا يلعبوا أهم المباريات ضد أعتى الفرق وكأنهم في تمرين
*ونرجع نقول الإدارة شطارة بتجيب الجدارة
*المهم
*كسب الزعيم الشكوى
*بحقه ومن حقه
*لكن كمان يجب ألا يفرح اللاعبون
*لأن الجهود الإدارية هي التي أعادت نقاطًا فقدوها بالتقاعس
*وما طوالي بتنجح تلك الجهود الإدارية في استعادة نقاط يفقدها اللاعبون بالتقاعس والاستهتار
*ومرات بقلة الحيلة والمهارة
*المهم
*قرار الاستئناف قطع قلوب ناس كده
*أهل البكا صبروا وهم يتثكلبوا أمس للصباح
*كنت أتمنى أن يتأخر القرار حتى الجمعة
*عشان كورة أهلي مدني الخميس ما تكون ترضية لناس بيت البكا المدور منذ صدور القرار
*المهم
*الزعيم يحتاج للكثير
*يجب ألا نغفل عن ذلك
*العمل الجاد ودراسة النواقص وتحديد من يسد الثغرات يجب أن يكون الشغل الشاغل
*ثم اختيار مدير فني (مقاول) عديل كده بعرف يبني كيف ويسقف متين ويشطب كيف
*التنافس الإفريقي قرب شديد
*سنبدأ من التمهيدي
*أنا وأخوي الكاشف
*الهلال ذاته حايبدأ معانا من التمهيدي
*رضي أم أبى
*من التمهيدي
*يعني جري الوحوش وغير بداية التمهيدي ما بحوش
*عشان ده كله ندرس القصة بتمعن
*وننفذ بحرفية
*أكيد سنخطو ولو خطوة للأمام
*وفي الجزيرة نزرع قُطنا
*أيها الناس
*الموافقة الأمنية بتاعت قباني جات ولا لسه؟
*ولعل غياب قباني (إن شاء الله ما يطول)
*يوفر فرصة كافية لأسد لإثبات وجوده
*إن تنصروا الله ينصركم
*أها
*نجي لي شمارات والي الخرطوم
*نعيد الكلام يا والينا
*الأمان هو المهم لدينا
*عين حمراء لكل المتفلتينا
*وطلقة في راس كل مجرم بقتل ويشفشف فينا
*تلقانا كلنا من عصرا بدري جينا
*نفرح بالمدينة الفيها اتربينا
*وتفرح بينا المدينة الحزينة

سلك كهربا

ننساك كيف والكلب قال ماليك أمان يا دا الزمان ماليك مكان يا مان

والي لقاء

سلك