نحنا بتاعين حركات خلي بالك

بابكر سلك

نحنا بتاعين حركات خلي بالك

زمااااان
بدري الكلام ده
بدري شديد
كنا صغار
أطفال يعني
ما كانوا بقولوا لينا الأطفال
كانوا بقولوا علينا الجهال
وفعلًا كنا جهال
براءة لي بهناك
نخاف من أم بعلو والغول
يوميًا يحكوا لينا قصة فاطمة السمحة
والغريبة يوميًا نحضرها بنفس الاهتمام
مسلسل من حلقة واحدة
تعاد علينا يوميًا
ونحضرها يوميًا
كنا شايفين الوطن ده حاجة كبيرة خالص
حب واحترام فطري لكل شبر في الوطن
كنا بنلعب كلنا مع بعض
كأولاد جيران
لا بنعرف جنسك شنو ولا جهتك وين
ولا دايرين نعرف ذاتو
كانت تجمعنا براءة ويضمنا حي يتمتع بتشكيل جميل من كل السحنات
وكنا نلعب معًا ونلهو في براءة ومحبة شديدة
كانت المحبة شديدة حتى بين أهلنا الكبار
في حينا من أرباب الأسر
كان عمر عباس يس، وعمك العشا الصول، وعمك حسن رسمي، وعمنا ميرغني الطاهر الجزار، وعمك صديق حسن التوم تاجر المواشي، وعمك الجميعابي، والقاضي عبدالله السنوسي، وعمك عوض حسين، وعمك إدريس الهادي وغيرهم كثر
وعلى الطلاق لي اليوم ما عارف لي زول فيهم قبيلة ولا جنسه شنو
هكذا كنا وهكذا تربينا
وهكذا كان السودان
كانوا بقولوا علينا جهال
يمكن لأننا وقتها كنا نجهل أن هذا الشعب الكريم مقسم إلى قبائل وخشوم بيوت
في تلك الفترة أيام كنا جهال
كانت لنا لغتنا ومصطلحاتنا ومفاهيمنا كجهال
ومن العبارات الشائعة كانت كلمة حركات
الزول ده عمل لي حركات
ما تعمل لي حركات جيش هي شنو؟ ما كنا بنعرفها، المهم نطلقها ونتعامل بها
وحركات شفع
يقول ليك: بطل حركات الشفع دي
وحركات نسوان
ثم كبرنا
وظهرت حركات أخرى على أرض الواقع: حركات مسلحة وحركات تحرير
ثم ظهرت كلمات مشتقة من كلمة حركات
بدأت بحراك
وتدرجت
وانتهت بمتحرك
والآن كبرنا
وكبرت أحزاننا
على وطن أضعناه بأيدينا
بإهمالنا وفسادنا على المستوى الفردي قبل المستوى الرسمي
وتطورت الحركات التي كنا نطلقها ببراءة
وأكثر الحركات تطورًا في الآونة الأخيرة هي حركات النسوان
طبعًا النسوان ديل بعرفن يمرقن القرش منك كيف ويسيطرن على مالية الأسرة
وبعرفن يمررن أوراقهن كيف
الآن وبعد اللجوء الحصل بسبب الحرب دي
مافي شغل للرجال بره الوطن العزيز
اشتغلن النساء
كان معلمات أو بائعات منتجات منزلية أو من خلال المشاركة في البازارات
وبي كده سيطرن على مالية الدولة، أقصد الأسرة، وبقى الداخل والمارق تحت إيدينن
وإذا اتضايقت الأسرة في المهجر واضطرت لبيع خاتم أو حلق
فإن المعادن، دهب الأسرة، مسيطرات عليه هن من بدري
وبسبب هذه الحرب بقت المالية والمعادن تحت تصرفن
حركات النسوان بقت حركات مسلحة عديل
مسلحة بالمال والذهب
وأب شنب بقى عبد المأمور
يقبل الهبات والشتات لأنه ما عمل حركات
الآن جميعنا يجتر حركات الشفع البريئة ديك
ويتحسر، داقًا يدا بيد
ويسترجع سائلًا:
مالكم يا ناس؟
الواحد بقى لا بجر إيد لا كراع
ما فيه من رمق
ويمطر لؤلؤًا من عيون جفت
فيسقي الخدود العطشى أملًا
ويعض على الشلاليف الكبيرة بأسنان فرقها السكري وأضحت مثلنا
كله واحد واقف براهو
أيها الناس
إن تنصروا الله ينصركم
أها
نجي لي شمارات والي الخرطوم
دايرين نرجع جهال يا والينا
نلهو مع جيراننا لا يهمنا من أي قبيلة أو من أي مدينة جينا
كل ما يربطنا سوداناوية ومحبة تروينا
ونبطل كل الحركات إلا حركات الشفع البتوحدنا وببراءة تأوينا

سلك كهربا

ننساك كيف والكلب قال: الله لا وراكم حركات الأمريكان، داهية تاخد الأمريكان

والي لقاء

سلك