بابكر سلك
قصة طحنون وبيكهام ليست قصة زول اتقدم واترفض فحسب
قصة تحتاج الوقوف عندها كثيرًا
وأخذ العبر منها ليستفيد الناس (العبر)
فمهما ساءت الأخلاق واندثرت المبادئ
فإن القيم تظل منتصبة بكل فخر من بين حطام الأخلاق المادية
عمك طحنون (ود زايد) يا دنيا ما فيك إلا أنا
يؤمن بأن القروش ممكن تشتري ليك أي شيء
حتى القيم والأمانة والأخلاق
كيف لا وهو الذي يرى أغلب الناس تركع للمال وترفع شعار
أن الدراهم تكسو الرجال هيبة ومهابة
فهي اللسان إن أراد كلامًا
وهي السيوف إن أراد قتالًا
ده بقى شعار الفئة الباغية فاقدة الكرامة والمبادئ
يقاتلون بالإنابة عن صاحب المال كمرتزقة أو متعاونين
ويستميتون دفاعًا عن صاحب المال
ملكيون أكثر من الملك
إلا أصحاب المبادئ والقيم
فإنهم لا يبيعون مبادئهم ولا قيمهم بكل أموال الدنيا
لأنهم تربوا على أن المبادئ لا تُباع
جدك بقول ليك ما تبيع يا ولدي
وكان بِعت ما تبيع رخيس
في دلالة إلى أن المال لا يضاهي القيم الراسخة
حتى العصفور يفر من القفص مرددًا
“حريتي لا تُشترى بالذهب”
طحنون عمل إغراء وقدم في فتح الخشم ما لم يقدمه قبله إنس ولا جان ولا جان كلود ذاتو
عربية مرسيدس مطلية بالذهب
جزيرة سياحية عديل كدة
و..؟.. و…. و
وحلف طلاق البكاسي البتودي شيلة الأكل ما ترجع
يدوها لأم العروس هدية
ظن أن لن يحورا
ولكنه عرف الله واحد
عائلة بيكهام رفضت العريس والإغراء الخرافي
لأنها عائلة ليست للبيع
لها إرثها الأخلاقي ومبادئها التي تتمسك بها
وترى أن طحنون ليست له الكفاءة لابنتهم
فمجرد أنك صاحب شرتيت خرافي
لا يحرك سواكنها تجاهك
قروشك لنفسك
ومقاماتنا ليست للبيع
أها
قالوا مريخنا وهلالهم اتفقوا على الانسحاب من نهائي كأس السودان
ليه؟
يقال إن هناك عرض سعودي بإقامة ودية بينهما بالسعودية
ينال كل طرف منهما ميتين ألف دولار
ولا أظن أن الإغراء (الطحنوني) في العرض المادي
ولكن الإغراء في حجم البعثة المسموح لهما به
كلو بعثة ستين نفر
نفر ينطح نفر
وده الإغراء حسب اعتقادي
يعني لو كان العرض ستمية ألف دولار وبعثة عشرين نفر بما فيها اللعيبة
كان الناديين رفضا العرض ولعبا نهائي السودان ببورتسودان
ألا توجد عائلة بيكهام في أنديتنا؟؟؟؟
نستجيب لأي إغراء ونتجاوب مع كل من راودنا؟؟؟؟؟
بيكهام تمام ما في كلام
وفي ناس جايبين لينا الكلام
يا ربي القصة فيها مكرمة للملمة (البعثة) المرافقة؟
قبل كدة بعثة رياضية سودانية ضمت طسعطاشر فرد
لاعب واحد وطمنطاشر إداري
بيكهام
تلحقني وتنجدني
أيها الناس
الحرب دي ربنا ما جابها لينا ساي
المهم
المريخ الليلة لاعب
ولا كالعادة متلاعب؟
بمشاعرنا وتاريخنا وصحتنا النفسية والجسدية؟
وهل سنفرح من داخل الملعب؟
أم ننتظر الزبون يفرحنا في كورتو؟
ابقوا معنا
أيها الناس
إن تنصروا الله ينصركم
أها
نجي لي شمارات والي الخرتوم
كان شفت يا والينا
لحم الخنزير بكتل القلب قالوا لينا
أهو بيكهام طلع قلبو حار يا والينا
وفي الضحية بنذبح أكبر خزير في الدنيا
ونحن نأكل الضأن والعجالي المتوفر لدينا
ونأكل مال الدولة يا والينا
وأهي قلوبنا ترجف أمام أي مليما
وعرفنا أنو البكتل القلب ما الخنزير يا والينا
البكتل القلب أكل حاجات تانية يا والينا
وأهو بنبيع بأبخس الأثمان ما لدينا
وما بناكل خنزير يا والينا
سلك كهربا
ننساك كيف والكلب قال مرة الخنزير قال لي الجماعة ديل لو أكلوني أنا القلبي بموت
وإلى لقاء
سلك
