بابكر سلك
يتحدث الناس عن فرصتين
ماعارف ليه الحديث ده
كل المعطيات في صالحنا عدا التحكيم
لكن دي مامشكلة
التحكيم ذاتو اذا انحاز يتبل وينهزم مع الخيار الاختارو
الرأي عندي نغلب بس
دايرين نتوج بهذه المنافسة بدون هزيمة
موش علي كيفنا؟؟؟؟
الليلة الامتحان الحقيقي لغريب
فالتعامل مع مباراة بالمعطيات الموجودة مع التهديدات التحكيمية الشفنا منها مناظر في مباريات سابقة
اكيد امتحان للمدرب
ولكنه امتحان لا يستحيل التعامل معه والنجاح فيه من مدرب خبير عرك الملاعب لاعبا للمنتخب ومدربا قوميا
كل المطلوب ان نثق بانفسنا
ان نقتنع بعلو كعبنا
فندنا هدفو كأس الهداف وعمل لذلك
تتذكروا الدردقها مزمل للغربال والقون فاضي؟
شغلهم كلو دايرين كاس الهداف عشان مايطلعوا من المولد بدون حمص
ونسأل الله ان لا ينالوا غيره في هذه البطولة
ومطلوب من اولادنا داخل الملعب الشفتنه وعدم المسكنة والسكوت علي قرارات التحكيم الجائرة
ماحسب لينا بلنت نستحقها
نحتج لما يعرف حاجة
فوت ليهم مخالفة نقوم الدنيا ونقعدها بدون ان نخرج عن طورنا
ونتعامل بوعي مع سقوط ناسهم داخل الخط
تلك السقطات التي تنطلق قبلها الصافرات فرحة لاعلان ضربة جزاء جائرة
دايرين نتطور
ولن نتطور مالم يتطور التحكيم نزاهة وحيادية
المهم
دور مريخاب الداخل كبير
بالذات ناس نهر النيل
ويظل التفاؤل قائما طالما بتري وعمر عثمان علي المدرجات حضورا انيقا
المهم
نتمني الظفر بالنخبة
ونتمني ان لايبطرنا النصر
ولايقعدنا عن المضي قدما في تنفيذ خارطة طريق البناء والتاسيس
وان نترك العيش لخبازو بالذات في الاحلال والابدال
تمنياتنا ان نكون جميعا شركاء في البناء والدعم ولو بشق تمرة
اللهم انصرنا نصرا نستحقه ونريده ويريدنا
فعندما يغيب المريخ عن منصات التتويج
تشعر منصات التتويج بالوحشة
ايها الناس
ان تنصروا الله ينصركم
اها
نجي لي شمارات والي الخرتوم
كان شفت يا والينا
الشوق بكتل فينا
بندور العودة يا والينا
بس آمنهم من خوف تتوفر لينا
وقصة البناء خليها علينا
سلك كهربا
ننساك كيف والكلب قال مصيرو الحي يلاقي يا بلدنا
والي لقاء
سلك
