قرش التمرين

بابكر سلك 

*زمااان لما كنا صغار
*ايوة لما كنا صغار
*انتوا قايلننا ولدونا طوال كدة ومصلعين؟
*كنا صغار
*والزمان كان زين
*والشعر مغطي الاضنين
*والبراءة تشع من اعيننا
*ماكنا خبيثين
*ولابنعمل حركات ولابنعرف حركات
*ولا بنعترف بالحركات
*الزول البعمل حركات
*طوالي بنثبتوا
*بنقول ليهو يازول هوي ماتعمل حركات
*بطل حركاتك دي
*كان مابطلها مابنلعب معاهو
*جننا وجن الحركات
*البراءة ممتعة
*اها
*في الزمن داك كان عندنا فريق في الحلة
*اي حلة فيها فريق
*نعمل شيرنق عشان نشتري كورة
*الكورة كان اسمها كفر (بفتح الكاف )
*كفر عديل كدة
*قريشاتنا مابتتم
*الناس الكبار بتموها لينا
*بعد داك نعمل تبرعات
*كبارنا يتبرعوا عشان نشتري فنايل
*ونمشي ابو مرين نشتري صبغة نصبغ الفنايل
*ونسمي فريق الحلة
*ناس يقترحوا الهدف
*وناس يقترحوا النجوم
*والنضال من الاسماء المقترحة
*والاصدقاء
*ونرسي علي اسم
*ونمشي الزريبة
*نشتري اربعة قنايات
*نعملهم عراضات
*الظروفوا كويسة بشتري كدارة
*صناعة محلية
*كنا مسمنها جلد التيس
*الكدايس بثبتوهم بالمسامير
*من الضهر تلقي الواحد فينا يلمع في الكدارة
*ويمسحها بالزيت
*ننتظر العصر بفارغ الصبر
*الغداء لو اتأخر مابنرجاهو
*التمرين عندنا اهم شي
*وعشان نحافظ علي الاشياء ونقدر نجيب غيرها
*سواء كانت كورة او تي شيرتات
*او حتي قناية كسرها زول خرخار
*كنا بنفرض علي اي زول مننا في اتمرين قرش
*اسمو قرش التمرين
*وبحسب فهمنا في تلك المرحلة وطموحاتنا
*كنا بنعمل مجلس ادارة
*آي والله مجلس ادارة
*كنا بنسميهو اللجنة
*اللجنة دي كانت بتدير شؤون فريق الحلة
*وبمسكوا المالية
*امين الخزينة بخت القروش في علبة
*اي تمرين بجي شايل علبتو دي
*تكشكش
*مليانه قروش
*وكان عندو كراس بسجل فيهو الناس الدافعين قرش التمرين
*طموحاتنا كانت كبيرة واحلامنا اكبر
*نقوم نعمل مباريات ودية مع فرق من الحلة الجمبنا
*وشوية شوية بقت المباريات في حتات ابعد
*يعني من العرضة نمشي نلعب في العباسية او البوستة
*وكبرنا وكبرت احلامنا
*بقينا نلعب مباريات في الثورة او ام بدة
*بعد مرات بنمشي رحلات من ضمن برنامجها مباراة مع ناس المنطقة
*اللجنة (الادارة) كانت بتنسق لل
حاجات دي
*والغريبة اعضاء اللجنة كلهم شفع
*منهم البلعب معانا ومنهم البكتفي بالعمل الاداري
*وكان عندنا ثوابت
*التمرين بحكمو الكابتن
*وكان عندنا كرامة
*لو احتجينا علي زول في اللجنة بستقيل
*الحلة دي كووولها تحنسو مابرجع عن الاستقالة
*قلت ليك كان عندنا كرامة
*وكان عندنا شفافية وامانة
*تسأل امين المال لو لاقيتو في الدكان اهلو مرسلنو وانت برضك مرسل
*وقلت ليهو الخزنة فيها كم
*طوالي بوريك بمنتهي الشفافية
*وكان عندنا تصفية عهدة
*لما نمشي رحلة آخرها مباراة
*بكون في اعاشة واجار بوكس وتحلية
*بمجرد مارجعنا الحلة
*الماسك الصرف بصفي عهدتو
*بورينا بنود الصرف والباقي كم وبسلمو لامين الخزينة
*شفافية قلت ليك يازول
*الاحلام كانت بتكبر
*نقوم نضم فريق الحلة في رابطة للناشئين
*وده ماكان سقف الطموح
*الطموح كان نكبر حبة ونسجل فريق الحلة في الدرجة الرابعة
*ونصعد ونصعد ونصد
*نصل الاولي
*نعمل استاد ونادي وجمهور
*ناس اللجنة تفكريهم كان كدة
*وطموحهم كدة
*وطريقة ادارتهم شئون فريق الحلة كانت بذلك الطموح وتلك الشفافية وتصفية العهد
*والكلام ده كان في كل الاحياء
*ولعل الاحياء منهم والاموات يذكرون ذلك جيدا
*ناس اللجنة كانوا بجتمعوا بالفريق كلو عشان يناقشوا امر شراء كورتين تاني عشان يبقي عندنا تلاتة كور
*شفافية ياعمك
*وارتفع الطموح لدرجة لو في زول لعاب في حلة مجاورة
*كنا بنقعنو يتسجل معانا
*بندعم الفريق بالمواهب كنا
*واذكر يوم ضمينا واحد اسمو حمد النيل من ام بدة
*كان عندنا تمرين يوم الجمعة الصباح
*حمد النيل جا شاقي الميدان ووقف يتفرج
*كان شايل اكياس
*ببيع اكياس ورق في سوق ام درمان
*قال ممكن تلعبوني؟
*قلنا ليهو جدا
*خت الاكياس برة وعصرها بي حجر
*نزل الملعب
*طلع داهية
*حريف شديد
*بعد التمرين راودناهو عن نفسه
*سجلناهو
*وبقي اضافة
*يجي للتمرين كداري من ام بدة
*وعفيناهو من قرش التمرين عشان بجي من بعيد
*هكذا كنا ندير شأن فريقنا بتلك العقليات الطفولية
*آآآه
*زمن
*استرجعت كل ذلك من الذاكرة
*ولم يصعب علي الاجترار
*كل ذلك دار بخلدي وانا اشاهد مباراتنا الاخيرة ضد الهلال
*لم اجد حمد النيل بالملعب
*ولا زول في المجلس يشبه في الاداء اداء تلك اللجنة الطفولية الطموحة
*ولاشفافيتها وتصفية عهدها
*فقط وجه الشبه بين لجنة فريق الحلة ومجلسنا الحالي هو قرش التمرين
*مجلس مافضل ليهو الا يشيل قرش التمرين من اللاعبين
*وصل اللهم وسلم علي سيدنا محمد الفاتح لما اغلق الخاتم لمن سبق ناصر الحق بالحق الهادي الي صراطك المستقيم
*ولاحول ولاقوة الا بالله
*المريخ
*اللهم ارحمنا اذا ما صرنا اليه
*ايها الناس
*الفيهو نحنا ده سببو نحنا
*حينما خالفنا القانون وعكسنا الشارع منقادين بالخلا لسواقين خلا اوصلونا لهذا المجهول واختفوا
*كأن الامر لايعنيهم
*وعشان ينصلح حال المريخ
*يجب ان نقوم نحن اول شي بالسير في الاتجاه الصحيح ونبطل نعكس الشارع بتلك العشوائية والبلطجة التي اوصلتنا للاقانون
*طريق العودة صعب لكنه غير مستحيل
*يحتاج للشجعان
*اها
*زمااااان
*ايام المدابغ شغالة
*ياحليل زمن المدابغ شغالة
*برغم انها كانت عاملة ريحة كعبة خلاس
*قالوا في عمك راكب بص الكلاكلة نازل اللاماب
*قال للكمساري نزلني في اللاماب يا ولدي
*لما وصلوا اللاماب الكمساري قال ليهو انزل ياحاج
*عمك قال ليهو انا نازل اللاماب
*الكمساري قال ليهو دي اللاماب ياحاج
*عمك قال ليهو دي ما اللاماب يا ولدي
*الكمساري قال ليهو دي اللاماب ياحاج
*انت كان مابتشوف مابتشم؟
*الجمل؟
*معقولة ياخ!!!!!
*كان مابشوف مابحس؟؟؟؟؟
*ايها الناس
*ان تنصروا الله ينصركم
*اها
*نجي لي شمارات والي الخرتوم
*عارف يا والينا
*واثقين اننا حانبني بلدا لينا
*بس قبل الطين يا والينا
*مفروض نعمل ملطم مبادئ وقيم نبني منو النفوس الفينا
*ونردم كل حفر اليأس الفينا
*ونبعد