المشكلة وين؟

بابكر سلك 

*في ناس شايفين إنو في مشكلة في المريخ
*وبقولوا المشكلة المشكلة
*ريدتك بقت هي المشكلة
*وفي ناس شايفين إنو ما في مشكلة في المريخ
*وبقولوا عاااادي
*المشكلة وين؟
*الناس الشايفين في مشكلة
*منقسمين
*بعضهم شايف إنو المشكلة في الأشخاص
*كلو يوم أشوف في شخصك أحلامي
*ولما تكتم تبقى إنت المشكلة
*وحلها في تغييرك
*نقوم نغيرك ولا على كيفك
*ونجيب غيرك
*بقرار نسوطها كلها
*وننصب زول تاني فارس لأحلام النجمة
*يفشل
*المشكلة وين؟
*نغير حنانو ذاتو
*والبعض الآخر من الناس الشايفين إنو في مشكلة
*بشوفوا إنو المشكلة ما في الأشخاص
*المشكلة في منهج غائب
*وغياب المنهج مرده ازدواجية القانون التي خلقت جمعيتين عموميتين
*وشلة أنظمة أساسية
*أي زول شال النسخة البتريحو وجري ختمها في الاتحاد
*وختم الاتحاد كريم جدا
*كان قصدتو ما بخذلك
*هذا النزاع والصراع القانوني هو المشكلة
*والناس الما شايفين في مشكلة
*بقولوا: صاح في جمعيتين ومسارين وسبعطاشر نظام أساسي
*المشكلة وين؟
*الناس ديل شايفين الحاصل ده كلو ما مشكلة
*لذا يتعجلون في إصدار قرار بتعيين لجنة تسيير جديدة من وجوه جديدة ولا مانع من وجه وجهين من الوجوه المجرّبة قبل كده
*المشكلة وين يعني؟
*هكذا يقولون
*البصيرة أم حمد قالوا ليها التيس دخل راسو في الزير وقرونو شبكن وأبى يمرق
*قالت المشكلة وين؟
*اقطعوا راس التيس
*انضبح التيس ولسه الراس جوة الزير
*يا بصيرة أم حمد ضبحنا التيس ولسه الراس جوة
*قالت المشكلة وين؟
*اكسروا الزير
*كسروا الزير
*وانكشحت الموية
*قالوا ليها ضبحنا تيسنا وكسرنا زيرنا وكشحنا مويتنا يا بصيرة أم حمد
*قالت والمشكلة وين؟؟؟؟
*أيها الناس
*أنا شايف مشكلتنا لا تكمن في أشخاص من يقودون دفة الحكم في المريخ
*ولكن المشكلة في المنهج الذي تتم قيادة الدفة به
*فدفتنا بقت زي البنطون
*والبنطون لا مرسى ولا مينا ولا يحزنون
*جربندية وركوب راس ساكت
*تخوين واتهامات وتراشقات لا تمت للمنطق والفكر بصلة
*ونحسن النية ونقول دوافعها ليست مصالح شخصية
*ولكنه حب الكيان
*ومن الحب ما قتل
*المشكلة وين؟؟؟؟
*(أول مرة أقول المشكلة وين)
*المهم
*على أصحاب القرار في هذه المرحلة الحرجة
*عليهم أن يدركوا جيدا
*أنها فرصة عظيمة لإصلاح الشأن بتوفيق وعقلانية تخرج المريخ من دوامته التي يدور فيها سنين عددا
*ويجب على بعضهم الذي كان جزءا من الأزمة في الماضي
*أن يكفر عن ذلك باتخاذ موقف واضح فيه صالح الكيان واستقراره بإنهاء الصراع القانوني الذي يمهد للم الشمل
*تغيير الأشخاص ليس حلا
*ترديد عبارة المشكلة وين ما بتبقي حل
*ولطيخ الطين في الكرعين ما ببقي ليك نعلين
*ولو ما عجبك لطخ
*المشكلة وين؟؟؟
*أيها الناس
*يمكن للمدير العام ولجانه والاستعانة بموظفين تنفيذيين خبراء أن يسيروا الأمر على سنجة عشرة بدعم من الأنصار والرموز
*لأنو متل هيك وضع بدي الفرصة لمزيد من التوافق
*وطرح حلول للإشكالية
*والوصول لمنهج واحد يحل كل المشكلات
*ويقود لمجلس محترم يكون جزءا من الوفاق الذي يهدف لقانون واحد وجمعية واحدة منقحة عضويتها تضم كل ألوان الطيف المريخي
*ووقتها يحق لنا جميعا أن نهتف
*المشكلة وين
*أيها الناس
*إن تنصروا الله ينصركم
*أها
*نجي لي شمارات والي الخرطوم
*كان شفت يا والينا
*كووولنا مشاكل من راسنا لي رجلينا
*ما بتتحل مشاكلنا إذا كان بعضنا بقول المشكلة وين يا والينا
*لأنو بشوف المشكلة ذاتها خيار لحل الإشكاليات الفينا
*ما في مشكلة بحلوها بمشكلة يا والينا

سلك كهربا

ننساك كيف والكلب قال ممكن تستصحب معاك جميع أسباب الفشل السابق وتنشد نجاحا جديدا ولما تفشل تقول المشكلة وين؟؟ المشكلة إنت ياخ

وإلى لقاء
سلك