ناس صبروا وناس كفروا

بابكر سلك

*أمس كانت قرعة التنافس الإفريقي
*ورمتنا في مسار يعتقد معظمنا أنه صعب
*وأن القرعة ابتسمت لأخوي الكاشف
*وعبّدت له الطريق حتى المجموعات
*ليطير بعدها ويحافظ على صفر موسوعة جينيس
*المهم
*القرعة ما بتبتسم لزول وتكشر لزول
*القرعة بسماتها تتوقف على التصنيف
*ولما نبتسم ليها نحنا
*بنغني في سرنا
*ورا البسمات كتمت دموع
*تصنيفنا هو البرمينا في البلاوي
*ما حظنا العاثر
*تصنيفنا كده
*وبصراحة
*كنا ندخل التنافس الإفريقي للمنافسة على البطولة (ولو أننا كنا بنزود العيار شوية)
*لكن ده كان طموحنا
*الآن ندخل التنافس الإفريقي لتحسين التصنيف
*ونستمر نلعب على هذا الهدف مواسم
*ونتقدم (شويييية) كل موسم لنحسن من تصنيفنا
*وبعد عمليات تراكمية
*حاتبتسم لينا القرعة ولا على كيفها
*لكن الآن نحن في مقام العتبات التي يصعد عليها الآخرون نحو مراحل متقدمة من البطولة
*يبقى نكون واقعيين ونعرف أنو هدفنا كووولو هو مجرد تحسين التصنيف
*وهذا لعمري أحد إفرازات الصراع المريخي الذي جعلنا قريب تمنية سنين نعود للخلف من حيث التصنيف
*وبعد ده يجي زول يقول ليك ما في مشكلة… المشكلة وين
*المهم
*لن تبتسم لنا القرعة طالما نقابلها سنويًا بي قداديمنا مادّينها لبعضنا وصرة وشوشنا لبعض
*أكيد حاتقول ابتسم فوق كم وأهل الدار مادين قداديمهم كشرة
*عندما نعمل بي (تبسمك في وجه أخيك صدقة)
*أكيد حاتبتسم لينا القرعة لأنه بنكون حسنّا من تصنيفنا (المخجل)
*ولن نحسن من ذلك التصنيف طالما الصراعات هي القاسم المشترك في مجتمعنا
*وإلى ذلك الحين نسأل الله أن يجمع الشمل ويقرّب وجهات النظر لما فيه صالح المريخ
*وعلينا تحمل تكشيرة القرعة
*ما فينا شي بعجبها عشان تتبسم لينا
*وإذا فعلت فهي بتكون بتضحك علينا
*المهم
*ناس الوفاق صبروا على ناس الصراع وناس الصراع كفروا بناس الوفاق
*والقرعة حاضنة التصنيف وبتاوقوا بالرقراق
*ونحنا بعد المسارين
*بقى عندنا تلاتة مسارات
*مسار الموردة ومسار الاستاد ومسار القرعة
*لينا الله نحنا
*أيها الناس
*أهلي مدني ممكن لو شد حيلو يمشي لي قدام
*يختوا في بالهم أنهم ينشدون مكانًا بعيدًا بالبطولة
*ويعملوا بجدية
*ولو فعلوا بنجزوا
*أما زمالة أم روابة
*نقدر نقول حظها عاثر
*لأنه في حال تأهلها ستقابل الزمالك
*وما أدراك ما الزمالك هذا الموسم
*ولكن العزاء سيبقى الشعار في المنافسة
*شعار الزمالة وشعار الزمالك واحد
*والفرق في حرف في الاسم فقط
*هنا هاء وهناك كاف
*وتشكيل اللام
*أيها الناس
*إن تنصروا الله ينصركم
*أها
*نجي لي شمارات والي الخرطوم
*كان شفت يا والينا
*ولا خليك
*راضين بالحال الفينا

سلك كهربا

ننساك كيف والكلب قال زمان كنا بننبح والجمل ماشي، أسي بنتفرج والجمل بنبح

وإلى لقاء
سلك