بابكر سلك
نيجيريا ست الاسم
أمس لحقت أمات طه
أخذت أربعة و(الشمس بره)
نحن ما غلبنا نيجيريا أربعة عشان نيجيريا كعبة
حاشاها
غلبناها أربعة عشان عرفنا قدر أنفسنا
واحترمناها احترام الوليدات لحدهم
دخلنا المباراة ونحن عارفين أن نيجيريا خطيرة
لكن ما استسلمنا
مدّدنا كرعينا قدر لحافنا
خندقنا بما فيه الكفاية
لكن اعتمدنا على الهجمات المرتدة السريعة
وهجماتنا هذه نتج عنها الهدف الأول بنيران صديقة
والهدف الثاني من ضربة جزاء نتجت عن ضغط هجماتنا المرتدة
كرة طويلة ولا خطيرة ولا حاجة
افتكر مدافع نيجيريا (بارك الله فيه) أن الكرة ملعوبة لمهاجم يأتي خلفه
قام ركب زميله وجلى (الهد) وضربت في يده
ودي كانت رصاصة الرحمة التي أطلقها منتخبنا على منتخب النسور
صقور يا عمك
أيها الناس
برغم سوء الإعداد وتأخيره
إلا أن منتخبنا يمضي بثبات
والأسباب كثيرة
نجاعة الجهاز الفني الذي يقاتل وهو يدرك تمامًا مدى أسلحته وإمكانياتها
لذا يحفر دائمًا للخصوم خندقًا نخندق فيه
ثم نحاول الانطلاق من ذلك الخندق علّنا نصيب صيدًا
فنصيد
هذا الجهاز الفني الذي يعتمد على التأهيل النفسي قبل كل شيء
استحق التقدير والاحترام
الحاجة الثانية اعتماد الجهاز الفني على الجاهزية البدنية والانسجام
لذا نجده مستعينًا بغالبية من نجوم الهلال (الأكثر جاهزية واستقرارًا)
الحتة دي أدت إلى تلافي عيوب قصر فترة الإعداد للمنتخب
ومن الأسباب الهامة الانسجام بين اللاعبين الذين أبدوا محبة ذابت معها كل الألوان
مبروك منتخبنا
بس الخوف من المباريات المتقاربة
لأن اللاعب السوداني ملول
وطموحه محدود
عشان كده يكون الليلة في السماء
بكرة (يتهنقط) في واطات الله والرسول دي
وهنا يأتي دور الجهاز الفني ونجاعته في الإعداد النفسي الجيد الذي يرفع الطموح ويجعل البطولة هدفًا منشودًا دون غرور، ويجب التعامل معه دون دونية
يعني نحلم بالبطولة
المشكلة وين؟
لكن نيجيريا لحقت أمات طه
المهم
مبروك أولاد كواسي
وعقبال ما نلحق السنغال أمات طه
اها
كيف تمضي عمليات الشتات بكوكب المريخ؟؟؟
قديمًا قالوا ليك: من اسمك نصيب
ألم تجد سيدة فرح اسمًا آخر؟؟؟
هذا الكوكب القاهر، الحياة فيه مستحيلة
لأنه ملتهب
ما زي القمر
القمر بركشة تمشيه وتقيل فيه
وتعزم أصحابك رحلة كمان
هدوء هدوء زي الهدوء
أما الكوكب القاهر
مولع نار حمراء
مشتعل
مستحيل تعيش فيه
اها
أخبار الاشتعال شنو؟؟؟
في أي لهلبة جديدة؟؟؟؟؟
نظفوا القاعة لإعلان قائمة الصراع الجديدة ولا لسه؟؟؟
للأسف
ستستمر داحسنا تقاتل غبرائنا إلى حين أن نحتكم للعقل
وإلى ذلك الحين ابقوا معنا
المهم
ليه قروش المريخ من الكاف بتجي عبر الاتحاد وقروش الهلال من الكاف بتجي للهلال (قنقر كي) المشكلة وين؟
المهم
لما يكون الأمر متعلقًا بالمنتخب
حقه تذوب كل الألوان
ويرفرف علم السودان
شكرًا كواسي واهب الفرح في زمن الحزن العميق
أيها الناس
إن تنصروا الله ينصركم
اها
نجي لي شمارات والي الخرطوم
كان شفت يا والينا
أجمل حاجة فينا
أننا قبلانين بالحال العلينا
وراضين بالأقدار البتحصل لينا
ثقة في الله يا والينا
سلك كهربا
ننساك كيف، والكلب قال كر علي يا نيجيريا… كر.. كر… كر وتاني كر
كده كم كر؟؟؟
وإلى لقاء
سلك
