في السلك
لا نود ولا نريد ولا نحب ولا نهدف ولا نستهدف ولا نقصد ولا في نوايانا
أن نشغل لجنة التسيير عن مهامها الآنية التي تسابق فيها الزمن وتعارك فيها تركة مثقلة وجدتها محكرة في انتظار حلول (كاشية) وآنية وحالة حقيقية وجادة وملحة،
نقدر لها الظرف السيئ الذي تولت فيه المسؤولية،
إن أصابت نخلع لها القبعات،
وإن لا قدر الله أخفقت نجد لها الأعذار ونقدر لها القسمة والنصيب،
وها هي تدير ملف الأجانب بحنكة رغم قصر المدة،
وها هي تدير ملفات المحليين الماشين والجايين باقتدار،
وها هم بعض الناس يخبروننا بمطالبة وكالة سفر بمصر المريخ بمبلغ يفوق اثنين مليون جنيه مصري،
اضربها في كم عشان تطلع بالسوداني؟؟؟
والله دي إلا نضربها طناش،
لأنو لو حولتها “بنكك” شاشة الموبايل ما بتشيل الأصفار،
ولو ضربتها بسعر السوق في ورقة،
داير ليك كم كراس ووجع راس،
والحل الأمثل نضرب طناش،
مبلغ قدر ده تذاكر سفر!!!
المريخ ده كان شغال سفير ولا شنو؟؟؟
ولكني أرجح أن خبر مديونية وكالة السفر (إشاعة)،
يكون طلعوها مغرضين بكرهوا النمير،
ما علينا،
خبر بي فلوس بكرة ببلاش.
المهم،
لا نود أن نزعج لجنة التسيير ولا نريد أن نشغلها،
ولكن هناك بعض الأمور لا تتحمل الانتظار،
صحيفة المريخ (أشرف الإصدارات)
ليست إعلامًا حكوميًا يسبح بحمد من يحمد المريخ،
ولكنها منبر خبر صادق يطمئن له الأنصار،
وهي ليست صحيفة،
بل منبرًا مريخيًا يمثل عظمة النادي،
ويكفيها فخرًا أنها الأولى والأقدم والأعرق كصحيفة متحدثة باسم النادي وتعبر عنه،
كانت قبل الميديا تمثل الموقع الرسمي للنادي ويجب أن تكون كذلك الآن برغم وجود الموقع الرسمي،
هي تمثل الحقيقة والمصداقية التي يطمئن إليها المريخاب.
طيب ليه طلع قرار بإغلاقها حاليًا أو تجميدها أو عدم صدورها في هذا الوقت،
والناس متلهفة لسماع أخبار جيدة عن المريخ يثقون بها دون الحاجة للتحري عن مصداقيتها؟؟؟
حقيقة قرار تجميدها ولو إلى حين حيرني،
بالذات ولجنة التسيير كان من أول أهدافها سرية العمل ومحاربة تسريبات الحصريات،
ألم تكن الصحيفة ضرورية في هذه المرحلة لتخرج على الناس بحصريات أعمال لجنة التسيير الجليلة؟؟؟
تعجبت من القرار، وباللجنة أعضاء تمثل أهرامات إعلامية تعرف مدى أهمية صحيفة المريخ،
الكرة الآن بملعب الحبيب سامر العمرابي والأنـيقة دومًا ميرفت.
ثم إنو،
في ظروف لجوء زي دي،
كونو إنو،
تغلق باب الرزق الوحيد لمنسوبي العمل بالصحيفة، ما صعب بالحيل؟؟؟
كلي يقين وثقة
بأن اللجنة ستراجع قرارها فورًا للاعتبارات أعلاه،
طارق خليل قاعد الصحيفة تمشي؟؟؟
تمشي وييييين؟
وخالص التحايا للحبيب بسبوسة.
المهم،
نحنا حنشارك إفريقيا بي جملنا ده؟؟؟
طيب ما تخارجوهو بي أخوي وأخوك،
وخارجوا الجابو معاهو.
أيها الناس،
لو رفض الكاف مشاركة أندية الكنغو استنادًا لقرار كاس،
يكون ربنا أدانا فرصة جيدة للإعداد،
يجب أن نستغلها في معسكر جاد مع مدرب بعرف،
لازم مدرب يعرف يوظف كويس،
ويعرف كيف يطور عوض زايد وكانتي وأسد،
وبعدها لكل حادث حديث.
جل الشكر للجنة التسيير،
مع تمنياتنا لها بالتوفيق،
بالذات في الوصول لوفاق ينهي الصراع القانوني بالمريخ ويعيد لنا الإلفة لبعضنا والاستقرار لنادينا.
أيها الناس،
سيكافا يا هلال،
وخليك سوداني،
وأبو الهل هو أكتر فريق سوداني مشاركة بسيكافا،
لكن ما حصل ليهو نصيب،
زي مارين الصومالي ومنقد الإثيوبي وضنب التيس اليوغندي،
قسمتو كده،
ولهم أجر المحاولة.
والمريخ لأنو شبع سيكافات،
حقو نضيف فقرة على النظام الأساسي تمنع الزعيم من المشاركة في سيكافا،
ونرفع شعار:
مانديلا دبل ليه.
أيها الناس،
ما هي جريرة جريدة المريخ؟
أيها الناس،
إن تنصروا الله ينصركم.
أها،
نجي لي شمارات والي الخرطوم،
كان شفت يا والينا،
الأنباء تشيل وتجيب لينا،
منو تاب وعمل خط راجع لينا،
ومنو نكر العملو فينا،
ومنو كان مزروع لينا،
ومنو هو المزروع فينا يا والينا؟؟؟
سلك كهربا
ننساك كيف، والكلب قال تمشي وتجي بالسلامة على كيفك.
وإلى لقاء،
سلك
