بابكر سلك
*مهما كانت طموحات وأحلام لجنة تسييرنا
*إلا أننا نستطيع أن نقول لهم بكل رحابة صدر
*أحلامكم جزء من ماضينا
*لأن فترتكم قصيرة
*ومن خلالها لا تستطيعون تحقيق كل إنجازات الماضي التليد والعتيق والمشرف للمريخ
*ولكن تستطيعون تحقيق جزء من ذلك الماضي
*لذا نقول لكم أحلامكم جزء من ماضينا
*هناك الدوري بدون هزيمة أول تعادل وهو ماضٍ لزول ما فاضي
*وهناك كمية من السيكافات
*تحتاج لجهاز حاسوب ليحصيها
*وأذكر أن أولها كان سنة ستة وتمانين
*أي قبل تسعة وعشرين سنة بالتمام والكمال
*ولسة لم يتجرأ نادٍ سوداني ولا نادٍ يوناميد من تحقيق ذلك الإنجاز
*الزمن داك سيكافا كانت تقيلة وسمحة
*سيكافا زمان ديك
*النوع الأصلي
*نوع زي ده الزمن ده ما في
*أذكر كانت في تنزانيا
*وأذكر من الفرق التي نافستنا على اللقب
*الشباب وسيمبا من تنزانيا
*قورماهيا وليبردس من كينيا
*لا كان فيها موز صومالي ولا قهوة حبشية
*أندية تتلتل
*ظفرنا بها مقدرة كده
*وجبنا الكاس من قرونو بالطيارة للمطار
*والمطار لغير العارفين به هو أرض كبيرة فيها برج مراقبة عالٍ وصالات جمارك وناس جوازات وبصات تشيل الناس وطيارات واقفات
*واحدات خردة وواحدات مركلسات لكن نقرة بدورن
*وكان فيهو (ستهم) سودانير بوينجات واقفات زي الورد
*وفيهو سلالم وعربات تجر السلالم
*وزلط كبير بتنزل فيه الطيارة
*والطيارة لغير الناطقين بها هي مركبة تطير حاملة العفش والناس والكاس
*والكاس لغير الحاصلين عليها
*هي تلك القطعة المعدنية البتلمع وبي شايلها سامي مارق بيها من الطيارة وبوراهو الجميع للقصر الجمهوري
*والقصر الجمهوري لغير الداخلين له
*هو المكان رفيع المستوى أعلى رمزيات الدولة ويقع فيه مكتب الرئيس ويتم بداخله تكريم المريخ
*عشان كده يا ناس لجنتنا الجديدة
*قلت ليكم أحلامكم جزء يسير جدًا من ماضينا
*وإذا شاركتوا في سيكافا خمسة وعشرين الحالية كان شلتوها
*لأنها أضعف نسخة تعرفها سيكافا على مر العصور
*ضنب التيس الصومالي؟؟؟
*معقولة ياخ
*وتظل أحلامكم جزء من ماضينا
*لأن ماضينا أريتو ماضي الوليدات لحدهم
*إنجاز وإعجاز ومانديلا
*الجبنة الإثيوبية ولا الجمبة ما عارف
*والله فرصة وفوتها يا مريخ
*ولكن لأن الحصة وطن
*نقول
*سيكافا يا هلال
*سيكافا يا أهلي مدني
*وبالعدم سيكافا يا دكتور
*لكن المشكلة المطار بي وين؟؟؟؟؟
أيها الناس
إن تنصروا الله ينصركم
أها
نجي لشمارات والي الخرطوم
تعرف يا والينا
لو من أحلامك تعود الخرطوم لينا
وتتغسل بالصابون يوميًا يا والينا
ولو الكهرباء قطعت شركة النور تعتذر لينا
ودورت القطر صفر لينا
شالنا في ضهره وكل الربوع حام بينا
والشوارع نورت بينا ولينا
والرفيرا الشية ودخاخينا
واللبن المبستر من كافوري يجينا
وبقى التعليم مجاني لينا
والعلاج بدون قروش ولا رتوش متوفر لينا
وصحة بيئة لا ضبانة لا بعوضة تعضينا
لو حلمت بي ده كلو يا والينا
بنقول ليك أحلامكم جزء من ماضينا
سلك كهربا
ننساك كيف والكلب قال حليل الخرطوم الكان شيخ زايد بحلم بأبوظبي تشبهها
وإلى لقاء
سلك
