بابكر سلك
*خسر أهلي مدني بالتعادل بسيكافا
*جاب قون عالمي
*قون في فريد
*زي فول فريد
*بتمضغ براهو
*وبتبلع براهو
*بتعرفوا فول فريد في بحري؟؟؟؟؟؟
*غايتو الما ضاق فول فريد
*يشوف قون أهلي مدني
*لذيذ وطاعم وما بغلط عليك
*من واقع الأداء أهلي مدني كان الأجدر بالنقاط الثلاثة
*ولو في نقطة رابعة كان بستاهلها
*واستغربت من تشكيلة الهلال
*كانت فاقدة الشافع اليافع اللعاب داك
*ما لعب
*أظن ما جابوا ليهو لعبة
*لكن كان لعب كان تعب
*(المي هار ولا لعب قعوي)
*القصة ما بتتحمل حركات شفع
*ويا حليل فطومة أختي
*الحاصل ده لو في زمن كردنة
*كيس الكوتش ده كان طار في دار السلام
*وفريد ده كان أسى يكون في الميناء البري البودي زنجبار
*لكن الشافع ده ما لعب مالو؟؟؟؟
*يكون نزل الروضة؟؟؟؟
*الترحيل لسه ما جابو؟؟؟
*قصة الشافع دي ذكرتني قصة بحكوها زمان
*أيام الاستعمار الإنجليزي
*قالوا الخواجة ومعاهو كم جندي كده
*راكبين حصينهم وحايمين في المروج الخضراء ديك دايرين يشفشفوا
*لقوا ليهم واحد عندو بهايم من ضمنها حميل بج سميييييين ومدوعل
*الخواجة قال لي سيد البهايم السلام عليكم
*سيد البهايم قال ليهو وعليكم السلام ورحمة الله وبركاته
*الخواجة صرة وشو
*داير ليهو سبب ما شَفشَفي
*قال لي سيد البهايم بنهرة كده: إيه بركاتو دي؟
*سيد البهايم قال ليهو بركاتو ده الحميل المدوعل ده
*الخواجة قال ليهو هات بركاتو
*وشالو الحميل ومشوا
*اليوم خميس والدنيا حلوة والوقت داك نظام عام مافي
*أها بعد كم خميس الخواجة فكر يعيد الخميس والعضة والشربوت
*ركب حصانو وساق جنودو ومشي علي سيد البهايم
*ولما وصلوا سيد البهايم جاهو جاري
*كان ما عمل كده يقولوا استخبارات جيش
*ولو عمل كده يقولوا متعاون
*الله يكتلني يريحني أنا
هكذا كان يردد سيد البهايم في سرو
*الخواجة قال ليهو السلام عليكم
*سيد البهايم اكتفى بقوله وعليكم السلام
*الخواجة طبعًا راجي بركاتو
*قام سأل سيد البهايم وقال ليهو فين بركاتو؟
*سيد البهايم قال ليهو بركاتو سرح مع أمواتو مشى يرتع
*الخواجة قال ليهو يرتع يعني شنو؟
*سيد البهايم قال ليهو يرتع يعني يرضع يا خواجة مشى يرضع
*فعرف الخواجة إن الحملان ديل قصر ولما يزوغن بكونن مشن يرضعن
*أسي القصة دي كلها مناسبتها شنو؟؟؟
*قصة ما عندها علاقة بالموضوع
*نرجع لموضوعنا
*فين بركاتو؟؟؟ الليلة ما شفناهو في الميدان
أيها الناس
*أبو الهل ما شارك في سيكافا عشان يشيل البطولة
*لو كان عايز كان شالها زمان
*موش كان حداشر مشاركة وما شالها
*أبو الهل يشارك بسيكافا للاحتكاك وتجهيز نفسو للأميرة السمراء التي يجري خلف ودها تسعة وتسعين سنة بشهادة كردنة
*الهلال اليوم البعترف فيهو بسيكافا كبطولة رسمية معترف بها من الكاف ويعمل جاهدًا لنيلها
*بعد داك الكلمة بتبقى كلمة سيكافا
*لو قبلت بيهو خلاص
*ولو رفضت وتمنعت ما جابت جديد
*لكن من المرحلة دي حارة والله
*المهم، بل الأهم، إعدادنا يسير على قدم وساق
*والكوتش يفرض هيبته ويغير جدول الإعداد
*بس لو اللجنة القانونية بواسطة الاتحاد خاطبت الكاف خطاب شديد اللهجة وتقدمت بشكوى
فإن أمر الكنغولي يكون قد حسم عشان نواصل إعدادنا لأورلاندو
أيها الناس، إن تنصروا الله ينصركم
*أها نجي لشمارات والي الخرطوم
*كان شفت يا والينا طيران سيكافا ولا هامينا
*الخوف طيران كيس رومانا سلك كهربا ننساك كيف والكلب قال تحسبوه لعب؟؟؟؟
والي لقاء
سلك
