بابكر سلك

عبارة نجدها على المركبات العامة
كلما تجي تركب مجاني
الكمساري يضحك ويقول ليك
مكتوب بكرة الركوب مجاني ما الليلة
عبارة للمزحة وأظنها فيها رسالة مغلفة تطالبنا أن نفرد التكشيرة الفي جباهنا دي ونطلق سراحها من أسرها على الجبين السوداني
تقرأها تضحك وأنت مقتنع أنو بكرة الركوب لا مجاني ولا شي
ده إذا ما زادوا سعر الركوب وزادوا الركابات
وها هو الاتحاد الإفريقي يتعامل معنا بتلك العبارة
بكرة الركوب مجاني
ولما تجي بكرة نلقى نفس العبارة
وإن دل على شي
فإنه يدل على أن الكاف يأمن جانب اتحادنا الذي عودنا على قراءة العبارة والعبارات المشابهة دون أن يكون له أي ردة فعل
والغريبة لما تعلق الأمر بمخالفة لنا
أيام الاتحادين وكل اتحاد مسك ليهو مبنى
الكاف ما قال لينا بكرة الركوب مجاني
ركبونا طوالي بقرار التجميد
وركبونا التونسية ورجعونا الخرطوم
الهلال وقتها كان راكب قبل القرار
ركبناهو نحنا بهدفي الغربال
ووقتها كانت مشكلة الاتحادين متوقفة على نتيجة لقائنا بالهلال
إذا فاز يسمعوا كلام الكاف ويبطلا مشاكل
وإذا خسر وقد كان
يقوم الاتحاد بمهمته الأساسية وهي وضع العراقيل في طريق المريخ
حتى الند اقتنع بنجاعة الزعيم في تلك المرحلة
وصرحوا بأنهم حيعملوا (فتحية) في المباراة الفضلت ليهم بالمجموعة نكاية بالمريخ
المهم
الكاف ما قال لينا وقتها بكرة الركوب مجاني
ركبنا (بكسر الراء) بقرار خلي ريحتنا طير طير
ولكن لما تعلق الأمر بالكنغو
بقت عبارة بكرة الركوب مجاني عنوانًا يمثل مانشيت عريض يعبر عن اطمئنان الكاف على نفسه لمعرفته الجيدة باتحادنا وبموقفه من المريخ
اتحادنا ما مسكين
بعرف يتمسكن متين وليه
ولأن الأمر يتعلق بالمريخ كان لزامًا على اتحادنا أن يمارس المسكنة
تلك المسكنة التي يمارسها اتحادنا مستمدها من مسكنتنا على مر العصور تجاهه
لما جمدونا وطيرونا
موقف مجلسنا وقتها كان شنو غير المسكنة والخنوع؟؟؟؟؟؟
أيها الناس
موقف اتحاد الكنغو ده
وإصرارو على مخالفة قرار كاس في شكوى مازيمبي
هو ما يقوي الكاف
واستخدامو لعبارة بكرة الركوب مجاني
ليس إلا تعبيرًا عن قناعة تقول إن اتحادنا بتمسكن في الأمور لما تتعلق بالمريخ
ويرغي ويزبد ويفرفر ويسهر الليالي لما يتعلق الأمر بالند
ويجهز ليهو لعيبتو كمان
اتحادنا بالنسبة للند زي سيكافا
مجرد إعداد للتنافس
وها نحن
نمارس الصمت الرهيب دون أن نخاطب الكاف ضغطًا ونمارس مع اتحادنا نفس الضغط
والضغط والسكري هينات
كعب المرض التاني
الجن بتداوي غايتو
أيها الناس
لأول مرة منذ بداية السبعينيات يبتعد عن الكيان
لأول مرة يغيب منذ ذلك العهد
فقد كان قريبًا
وقريبًا جدًا سواء كان عضوًا بالمجلس أو لم يكن
وكان قريبًا وبشدة
حينما يطل خلاف بالزعيم
يفتح داره لحل الإشكاليات
يقرب بين وجهات النظر
وكان شجاعًا
يصدح بما يرى سواء كان صوابًا أم خطأ
ونال شرف أول رئيس بعثة يعود للوطن متأبطًا كأس بطولة
إنه الزعيم محمد الياس محجوب
اللهم ارحم عبدك ود الياس وأكرم نزله وهو الذي لبى النداء فجر الجمعة
وما أدراك ما حكم الضيف الذي يحل على الرحمن بالجمعة أو ليلتها
اللهم لا تفتنا من بعده
واجعل البركة في ذريته وفينا
واجعل الجنة مأواه يا رب العالمين
أيها الناس
إن تنصروا الله ينصركم
أها
نجي لي شمارات والي الخرطوم
كان شفت يا والينا
الحرب دي ورتنا علوم ما كانت لدينا
عرفتنا قيمة وطن وشرحت لينا صورة قريش لما يتلوها علينا
أطعمهم من جوع وآمنهم من خوف معاني عميقة يا والينا
علمتنا الحرب نعتذر لوطن ظلمناهوا يا والينا
دي بلد يرفعوا ليها علم وعبارات مخجلة يا والينا
كانت عادي تجري على ألسنتنا لأننا ما درينا
أنو السؤال ليس البلد دي قدمت لي شنو يا أخينا
السؤال أنا قدمت شنو للبلد يا والينا

سلك كهربا

ننساك كيف والكلب قال خدوا المناصب والمكاسب بس خلولي الوطن

وإلى لقاء

سلك