بابكر سلك
*من غيرنا
*يعطي لهذا الشعب معنى أن يعيش وينتصر
*منوووووو
*العندو شي يجي النقعة ويدق صفرو
*تشاما نجم اللقاء
*جعل الصفر شامة علي الخديد
*لابتتلون
*ولابتتشال بالليزر
*ولا بتتمحي
*تشاما يؤكد علي أن الصفر شامة
*علامة مميزة
*المهم
*جني وجن الحكم الماسك جاز
*بكون صعب خلاس
*مابخليك تتهني بي كورتك
*تستلم
*مابهمو انت منفرد ولا ممكن الهجمة دي تجي قون
*جييييت بصفر
*ماسك جاز شديد
*طالما انت في وضع هجوم
*يبقي اللعبة خطرة
*خطرة علي الخصم
*والحكم واجبو يحمي الخصم ويوقف الخطورة
*أي لعبة خطرة
*جييييييت
*والقانون مخصوص ما أحصى اللعبات الخطرة
*لم يحصرها
*سماها خطرة وخلى تقديرها للحكم
*والحكم الماسك جاز بكون دقيق جدا في تقدير تلك الخطورة
*هو الوحيد البحدد اللعبة الخطرة من اللعبة الماخطرة
*عشان كدة ماسك جازو وبوقف أي لعبة خطرة
*ويا سلام علي الحكم الماسك جاز
*ولا بخجل
*ولا بهمو فريق صغير وجاهل مولود في الفين وسطاشر
*ولا يخاف لومة لائم
*بالذات لو كان الفريق ليس لديه من الجمهور مايتشدد ويلوم الحكم الماسك جاز
*زمااان كان الغمت بتم بالليل في ظل ضلمه وعدم نقل تلفزيوني
*اسي الغمت بقي الضهر والناس في المكاتب
*لامن شاف ولا من دري
*غايتو الداير يغني بالذات في افريقيا
*لايهاجر لايركب سمبك
*يشتغل حكم صارم ويمسك جاز
*دورة قرية واااحدة ببقي من ذوي الاخدر البتحرن
*يتحرن علي منو؟
*تمسك جاز يجيك يجرر أذياله
*قال يتحرن قال
*يتحرن باليا؟؟؟؟؟
*بي كرشوم عيب الشوم
أيها الناس
قد ينعم البعض بالبلوي وإن عظمت
وقد يبتلي الله بعض القوم بالنعم
لكن في إفريقيا دي معظم ابتلاءاتنا بتكون في حكامنا
ربنا ببتلينا بي حكامنا
أو يبتلينا بالبتحكموا فينا
رئيس لجنة شعبية
لجنة شكاوي
الناس البصدروا اللائحة وفقا للواقعة
يعني اللائحة تطلع بعد الواقعة وتتطبق عليها بأثر رجعي
الناس البتتجاوز السن القانوني والقيد
ديل كلهم بلاوي ربنا ببتلينا بيهم
لكن الحكم الماسك جاز عفيت منو
مقتنع بي جازو
ومابخجل
حسبما يراه
هو اليراه هين
رأي البتحرن
الاخدر البتحرن وماضروري الزول يتمرن
أيها الناس
قبل تسعة وتمنين سنة ظفر الزعيم بكأس سيكافا
لما كانت سيكافا
سيكافة زمااااان
التقيييلة وسمحة ديك
من الفرق الشاركت فيها ليبردس وقورماهيا من كينيا
سيمبا والشباب من تنزانيا
أندية كبيرة وعريقة
ماكانت لعب عيال
لعب ناس كبااااااار
مافيها ولاقاصر
الزمن داك القيصر الصحي صحي ناصر بابكر ما اتولد
الزمن داك
زول مامسجل في تيم مابدقها
أقل عدد حضور جماهيري لمباراة في تلك البطولة كان عشرين ألف
المباراة الختامية بين الزعيم والشباب التنزاني
الاستاد مافيهو شبر يقيف فيهو بائع تبش أو تسالي
الكورة كانت العصر ما الضهر
عشان الناس تجي من الشغل وتحضر
مافي كورة الصباح وكت الفطور
ولافي كورة الضهر والناس في الشغل
كورة ناس كبار ما أطفال
ومافيها حكم ماسك جاز
مازي الزمن ده
الزمن ده سيكافا بقت كلو زول بي جازو
لذا ساهل جدا تشتري المجد باغلي ثمن
بالتفاني والصرف الخرافي وإعداد العدة
بمية أجنبي وشافع لم يبلغ الحلم
المهم تشتري المجد
والعيب تجي تشتري المجد
تدفع
ومايسلموك البضاعة
أيها الناس
ناس فطومة اختي
برضو مات
أيها الناس
“إن تنصروا الله ينصركم”
أها
نجي لي شمارات والي الخرتوم
كان شفت يا والينا
كلو شي بي تمنو في الزمن العلينا
والعندها الحنة بتحنن إيدينا ورجلينا
كعب لو صرفت علي الحنة والحنة ماشالت يا والينا
سلك كهربا
ننساك كيف والكلب قال أجي يا البرقش
وإلى لقاء
سلك
