بابكر سلك
*في فترة وجيزة استطاعت لجنة التسيير ان تشيد من الحطام الذي وجدته وبعد الاستعانة بالجدد بالذات الأجانب
*استطاعت ان تبني إسكليتون انيق لفريق الكرة
*واستعانتها بجهاز فني علي قدر الطموح كان ضربة معلم
*لأن عمليات تشطيب الاسكليتون تحتاج لخبير فنان
*يستطيع ان يوزع المبني لاجزاء جميلة ومفيدة ومدهشة
*التشطيب داير اخصائي ديكور متمرس
*بعد كدة بتجي مرحلة اكتشاف النواقص لملئ الخانات الضعيفة بأعمال في مستوي البناء الجميل
*وكان الاجمل ان جعلت التسييرية في عقدها مع الكوتش
*جعلت امر التعاقد والترشيح من اختصاصها لامن اختصاصات الكوتش
*وهذا مايخرج الكوتش عن دائرة الاتهام بالسمسرة
*يورينا بس الخانات البحتاج فيها لدعم من جدد
*ومواصفات الدعم المطلوب
*وبعد داك النادي عن طريق لجانه المختصة يبحث ويرشح ويتعاقد
*تشطيب هذا الاسكليتون الجميل
*لايحتاج لسرعة
*بل يحتاج لتأني وصبر
*هذا الصبر يحتاج لجمهور واعي يصبر علي عمليات التشطيب ولايستعجلها
*قد يكون هذا الموسم الافريقي هو من اهم عمليات دارسة كيفية التشطيب حتي يكتمل البناء
*عشان كدة نساعد التسييرية بالصبر الجميل
*اما هذا الموسم
*فهو للاعداد واكتشاف القصور
*ولايخلو من تحدي
*ولكنه ليس بنهاية للمطاف بقدرما هو خطوة علي طريق المجد
*وطريق المجد هو الطريق للمطار
*والطريق للمطار بنعرفوا كويس ومافي زول بعرفو اكتر مننا ولافي زول بوصفو لينا
*شارع المطار ده اسمو شارع افريقيا
*وشارع افريقيا ده نادي مشي فيهو لي آخرو غيرنا مافي
*ومن غيرنا
*ايها الناس
*اهلي مدني يستحق التهنئة علي فوزو بالامس
*وبقليل من الجهد يستطيع جبرة وابنائه من العبور
*والزول الراوغ وعكس الكورة الجا منها القون ده
*كان مادايرنو يا ناس اهلي مدني
*من ايدكم دي لي ايدنا دي
*الاتفاقات الشفاهية غير ملزمة
*والدليل الاتفاق مع كابو علي عدم اللعب
*وبعد ذلك النكران حطب
*مبروك اهلي مدني
*المهم
*الجاموس ده كان قام صعب خلاس
*شاكاااال
*وبنطح
*وقرنو سنين ممكن يشرط البطن
*عشان كدة لو لاقاك جاموس في غابة
*ارقد
*ارقد في واطات الله دي عشان ماينطحك
*اما مريخ بانتيو الشقيق
*فبرغم السوء الذي ظهر به
*الا ان الحكم اكلو في قون عديل كدة
*والعترة بتصلح المشي
*برغم ان المشي عن طريق عزام صعب
*صعب لكن مامستحيل
*المهم
*قلت لي شالوا كاس الكنغو؟
*الكنغو قرنبو؟؟؟؟؟
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*جهودك مقدرة فينا
*وفي الاساس تعيينك كفاءة ماسياسة يا والينا
*تدرجت في الشغلة ونحن عارفينا
*عشان كدة نجاحاتك ميدانية قدام عينينا
*ولما نقول تكنوقراط مافي زول يلاوينا
سلك كهربا
ننساك كيف والكلب قام جاري عديل كدة… دي ماحالة دي
وإلى لقاء
سلك
