لون المنقة

عدد الزيارات: 21٬012

بابكر سلك

*مثلا المنقة بتاخد ليها كم سنة من زراعتها الي ان تثمر
*قول مثلا المنقة بتثمر شهر اطناشر
*من غير المنطقي تزرع ليك شتلة منقة شهر عشرة وتجي شهر اطناشر شايل كراتينك داير تلم الثمار وتمشي السوق
*لازم تصبر عليها
*وماصبر ساي
*صبر باهتمام
*ري وتطعيم وقص ونظافة
*وتبعدها من الغنم
*فالماعز اعتاد ان يقتات من شتلاتنا موسميا
*كلوما نزرع شتلة
*ونهملها
*تدخل الاغنام تاكلها
*لنزرع بالموسم الجديد شتلات جديدة
*وصلنا لدرجة بقي بستاننا ارضا لزراعة اشجار غير مثمرة
*اشجار ضل يأوينا ويقوينا مابتوفرو لينا
*قد تنثر الاشواك بيننا
*مما يعيقنا عند الدخول لبستان نظن انه روضة
*والغريبة هذه الاشواك لاتقتل الحنين للبستان فينا
*ولا تمنع الاغنام من التهامها
*فالغنم ماعندو قشة مرة
*شعارو (الشوك والريد)
*المهم
*من يريد ان يستثمر في الزراعة
*عليه بالصبر حتي الاثمار
*وعليه بالجهاد والاهتمام منذ الغرس وحتي الاثمار
*وعليه بمحاربة الآفات والاغنام
*وسبحان الله الفرع البتقرمو غنماية
*بتضقلم في مكانو
*محل مضغتو بقيف فيهو
*يبقي ايها الناس
*نحنا زرعنا مجلس(لجنة تسيير) يادوبك ليهو شهر ونص
*وجبنا خبير زراعي يادوبك ليهو شهر
*وحتي شتلاتنا غرسناها يادوبك ليها شهر ونيف
*نقينا من الشتول القديمة
*واضفنا شتلات مستوردة جديدة
*وكل ده ماتم ليهو شهرين
*عشان كدة ماكنا نتوقع ان يطرح بستاننا منقة في هذا الموسم
*ولكن شكل الاجادة وحجم الاثمار المتوقع بات واضحا للعيان
*تنقصنا بعض الشتلات المحسنة
*منقة جنوب افريقيا جيدة وسريعة الاثمار
*نكمل في هدوء نواقص بستاننا ونصبر
*بالتأكيد سنجني في موسم الاثمار انتاجا يعوضنا بور السنين وعدم الانتاج
*ايها الناس
*خطوات ايجابية مقدرة قمنا بها
*قليل من الصقل والاهتمام
*عدم التسريح
*ايجاد دوري منتظم وقوي نشارك به
*سد النواقص والثغرات من الوطنيين (اذا فيهم من يستحق) والاجانب
*اسي التجربة قالت نحنا ناقصين تلاتة تسعات
*محتاجين تلاتة تسعات ضروري
*فمركز تسعة عندنا لاصابة قباني واسد ورمضان لو قلنا مرات بشارك في الخانة دي
*بقي خلا
*واول فائدة نجنيها من مباراة لوبوبو
*هي الاتصال بتلاتة تسعات قامات قدر الطموح
*ثم بعد ذلك
*المشاركة في اي دورة اقليمية قوية
*الاعداد بجدية للبطولة العربية
*انها مرحلة صرف تحتاج لصرف من لايخشي الصرف
*وقد تطول
*فالاثمار له مدة يجب ان تقضيها الشتلات
*وموسم للطرح
*لذا اوصي لجنة التسيير ان لاترمي الراية
*وان لا تندم علي صرف يتم توجيهه بعلمية ومنهجية
*وان لاتبخل علي البستان بالشتلات الجيدة ولا بمصاريف الرعاية والاعداد لموسم جني الثمرات
*وبعدها يحق لنا ان نغني
*لون المنقة الشايل المنقة
*ايها الناس
*اذا كان غرس شهرين ينتج ثمارا
*ماكانت هناك بساتين صفرية الاثمار مية سنة
*ودعونا من رمي اللوم علي المجلس الفات
*نعمل ونعالج الثغرات دون ضياع الزمن في من سرق الروب والسبب منو
*زمااان قالوا جورج بوش بن لادن كان تاعبو شديد
*وكان اي اخفاق برميهو علي بن لادن
*قالوا كان عندو خطاب بالبيت الابيض
*اثناء الخطاب جاهو الزول البلبس نضارة سوداء
*الدايما بقيف خلف الرئيس وبعاين بعيد داك
*دنقر في بوش وقال ليهو
*الكهربا في نيويورك لحقت امات طه وقطعت
*بوش قال ليهو ITS BIN
LADIN
*وواصل خطابو
*بعد شوية الزول رجع ودنقر فيهو وقال ليهو
*الاعصار يهدد سواحل امريكا ومثلث برمودا هايج شديد
*بوش قال ليهو ITS BIN LADIN
*وواصل موضوعو
*بعد شوية ابو نضارة جاهو وقال ليهو
*مرتك ملت البيت الابيض بزاغ وبعد الفحوصات الاطباء قرروا انها حامل
*بوش قال ليهو
*ITS BIN LADIN
*عشان كدة
*بدل نرجع لي ورا ونرد اي اخفاق لبن لادن
*حقو نعالج اسباب الاخفاقات بصرف النظر عن اسبابها
*فمعرفتنا بمن سرق الروب لاترد الروب للسعن
*دعونا نصنع روبا جديدا
*ونخج السعن بمزااااج
*وطالما نحن في مرحلة زراعة
*ابعاد الاغنام اهم عمل في هذه المرحلة
*وكوووولنا
*خلف اللجنة في موسم الزراعة كي يحق لنا الاستمتاع بالثمار
*ايها الناس
*ان تنصروا الله ينصركم
*اها
*نجي لي شمارات والي الخرتوم
*تعرف يا والينا
*ليس سحقا للفشل يا اخينا
*بل شكرا للفشل الذي علمنا النجاح يا والينا