بابكر سلك
*زمااااان
*قالوا في زول امي ومبهدل وعديم ثقافة وشين
*لكن نفسو فاتحة شديد
*يمشي اي مناسبة
*يعزل اجمل بيت
*يسأل عن اهلها وعنوانها
*وطوالي يسوق اهلو يمشي يخطب
*البنات البعزلهن كلهن
*ياخريجة
*يا بتقرأ في طب الاحفاد
*يا طالبة في مامون حميدة
*عزاااال وحي نفسو
*وطبعا لاننا شعب لايحب الطنقعة ولا التنمر
*بكون الاعتذار بي صورة مهذبة لاتخدش الانسانية في شي
*برغم ان الكفاءة في الزواج مطلوبة شرعا في الزوج
*لكن الاعتذار بكون بصورة راقية
*وصاحبنا بعد اكتر من مية خطوبة
*لسة بمني النفس بالارتباط علي سنة الله ورسولو بساندريلا الجميلة
*الخطاب المتعلمين المثقفين المهذبين الوسيمين
*مابخاف منهم اصلا كمنافسين ليهو علي عرش قلوب الحسان
*زول عازي نفسو شديد
*عمرو ما سأل نفسو
*البنات ديل برفضنو ليه؟؟؟
*مع كل رفض جديد كان بحن علي العروسة الرفضتو ومقتنع تماما انها هي الخسرانة
*ثقة بالنفس غريبة
*والغريبة هذه الثقة بالنفس لاترتكز علي اي مرتكزات تعليمية او ثقافية او حتي مادية او وسامة ساكت مختومة بي شامة
*ويترفض مجددا
*ويظل يكرر في محاولات كسب ود احدي اميرات الجمال والبهاء المسلحة بالعلم والثقافة
*في بعض مرات الرفض كان اهل العروسات بردوا بالانجليزي
*ماطنقعة منهم
*لكن جرت العادة عندهم علي ذلك لانهم تمنية تسعة شهور في السنة بكونوا في اوروبا
*عشان جديع (الايشنات) واكل (الآر ) بقي طبيعي عندهم
*والغريبة صاحبنا مافي ايشن بتخوفو
*كان نسابتو القاصدهم اكلو الآر ولا اكلو الجار جم كدة
*يهز راسو من فوق لي تحت مدعيا انو فاهم حاجة
*وياكل ملف
*ويجدد المحاولة مع اخري
*وهكذا
*هكذا هو حالنا الكروي
*نحلم بالاميرة السمراء
*احلام يقظه
*وهي لا تعيرنا اهتماما ولا في النوم ذاتو مابتجينا كحلم
*ونصحو لنمارس طقوس احلامنا ونحن في يقظة نائمة
*ونفتح خيال
*دايرين عروسة اميرة دكتورة
*ويجينا الرد المهذب دايرة اقرا
*حالنا الكروي كدة
*نحلم دون ان نعمل علي ما يحقق ذلك الحلم
*زلوط نحنا
*دايرين نصل كاس العالم ونشيلوا كمان
*دايرين نظفر ببطولات الكاف كلها وسنويا
*ودايرين طريقة نشارك بيها في ابطال اوروبا
*ونبشتن ليك البارسا وباريس
*الريال ده دقيقة مابقعد معانا
*كرشوم يخت ليك مبابي في جيبو الورا
*وابوجا ينقذ ضربة جزاء لي البايرن
*ويتقابل المريخ والهلال في نهائي ابطال اوروبا
*نحنا كدة
*ونحلم بس
*ونجي نتبل بدموع الفشل
*بل بس
*هكذا نحن
*ايها الناس
*خلي اي زول
*مصر القريبة دي
*تلقي الزمالك مثلا لاعب بدوري نايل الممتاز
*والزمالك مواليد الفين وسبعة لاعب ضد انبي مواليد نفس السنة في الدوري
*والزمالك مواليد الفين وتسعة لاعب دوريا ضد مواليد نفس السنة من نادي فاركو مثلا
*اتحادهم ينظم كل تلك البطولات
*وانديتهم تهتم بها
*وتنشئ مراكز الاختبارات للنشئ بكل ارجاء الجمهورية
*واذا جيت للملاعب
*تلقاها طبية
*لابعوق لاعب ولابتعوق ناشئ
*وتعال شوف الاستادات ومستواها
*استادات الدولة
*هذه مصر ولم اتحدث عن المغرب ولاتونس ولا الجزائر ولاعن محترفي تلك الدول باوروبا
*نحنا محترفنا كان بالغ يمشي ليبيا ويرجع زي الدفار
*مشوار بس ماشي وجاي
*وبعد ده كولو نشيل املنا
*نسوق اهلنا
*ونتقدم للاميرة بكل ثقة
*لأ وايه
*نزعل لما ترفضنا
*ايها الناس
*مفروض نمشي محو امية
*ثم بعد ذلك نأهل انفسنا ثقافيا
*ونمشي الحلاق
*ونعمل نيو لوك
*ونتقدم بعد داك
*يمكن واحدة تقبل بينا يكون فاتها القطر وكملت القراية
*ايها الناس
*ان تنصروا الله ينصركم
*اها
*نجي لي شمارات والي الخرتوم
*تعرف يا والينا
*بي طريقتنا دي مافي واحدة بتقبل بينا
*يا نغير طريقتنا يا اخينا
*يا نموت كمد وتكتلنا العزوبية الفينا
*لكن كلو مرة نشيل املنا ونسوق املنا ويحرجن اهالينا
*كترت علينا
سلك كهربا
ننساك كيف والكلب قال مرة في كلب من اهلنا جنو يرقد في الطين وياكل من الكوشة ومبشتن لكن طموحو عالي.. مايشوف ليهو كلبة وولف مجيهة وبي جنزيرها وجرجيرها الا يقوم يبلل كل اللساتك والحيط واي عمود كهربا ولو كانت قاطعة ويباريها طالب ودها…. سيدها بديهو طلقة طوالي
وهداك مجدوع في الطين زي بشكير المسح يحلم برفيقة درب لولي بتقرأ في الاحفاد.
وإلى لقاء
سلك
