يوم القيامة العصر

بابكر سلك

*السنغال غلبت
*الكنغو غلبت
*الا نحنا
*ماغلبنا
*لكن كتلنا آخر آمال التأهل لمونديال 2026
*والله نحنا نكتل اي شئ
*نحنا جدنا تهراقا العلم الناس الحرابة
*غنانا كلو سيفك للفقر قلام
*يغلبنا امل؟؟؟
*والله نكتلوا ليك زي الماحاصل شي
*لكن بصراحة
*لم نقتل الامل اليوم
*قتلناهوا بليبيا الشقيقة
*طعناهوا يوم السنغال
*وقلمنا فقرتو يوم مباراة جنوب السودان
*بدري وديناهوا
*بعد كدة فضل لينا نهائيات الامم
*علي اليمين نوريها ليك كتاب
*ايها الناس
*امس قلت ليكم لقيضنا ضالتنا في الحرب كشماعة
*اصلنا بنحب الشماعات
*في المواصلات دي بنشمع
*والآن بعد قتل امل التأهل لنهائيات كأس العالم
*اذا في زول قال لينا
*انتوا حا تتأهلوا لنهائيات كاس العالم متين
*ماحانركبوا شماعة بعد الحرب
*حانشعبطوا ليك في شماعة زي الشماعة
*اذا قال لينا متين حاتتأهلوا لنهائيات كأس العالم
*حانقول ليهو يوم القيامة العصر
*اصلوا نحنا لما نكون عايزين نقنع زول
*بنقول ليهو يوم القيامة العصر
*ايها الناس
*لو ختونا في مجموعة فيها جيبوتي والصومال وتشاد وافريقيا الوسطي وجنوب السودان
*وقالوا يتأهل من المجموعة اربعة منتخبات
*باقي ليكم بنتأهل؟؟؟؟؟
*اكيد مابنتأهل
*لعشوائية ادارة شأننا الرياضي
*علي جميع الاصعدة وعلي كل المستويات
*بدءا من الحكومة ومرورا بالاتحادات ووصلولا لادارات الاندية
*ولأننا نرجح جوانب فرعية علي جانب المصلحة القومية
*اسي الجابنا نلعب في تنزانيا شنو؟؟؟؟
*عليكم الله اخواننا الاهلة لو خيروهم بين الهلال يشيل كأس الاندية ولا المنتخب يشيل كأس افريقيا بختاروا شنو؟؟؟
*عليك الله بختاروا شنو؟
*الاخوة المريخاب لو خيرناكم بين المريخ يصل نهائي افريقيا ولا المنتخب يصل نهائيات كأس العالم
*في ذمتكم بتختاروا شنو؟
*الاخوة في اتحاد الكرة
*لو تعارض اعداد المنتخب مع اعداد الهلال
*الاهم عندكم ياتو اعداد؟؟؟
*الاخ الوزير
*وزير الرياضة
*الاخت الحكومة
*عندكم للكورة شنو؟؟؟
*ماداير اقول للرياضة
*عشان ماتبقي كتيرة عليكم وتقولوا لينا بعد الحرب
*راجنكم لي يوم القيامة العصر
*المهم
*فضلت لينا كورة تحصيل حاصل
*حقو نجهز فيها صغار المنتخب مع ضم وجوه شابه جديدة
*نريد ان نظهر بالنهائيات الافريقية بمظهر يحفظ ماء الوجه
*ونعد منتخبا يقدر يلعب كورتين في تلاتة يوم بنفس واحد
*وماتقول لي بعد الحرب
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*فرقنا كلها بتطير لينا
*اي شي في بلدنا طاير يا والينا
*حتي الاسعار طايرة لينا
*والسعادة طبعا طبيعي طايرة لينا
*وسودانير كأسطول مابتطير يا والينا

سلك كهربا

ننساك كيف والكلب قال عيشتكم ذاتها طايرة لكن سودانير كأسطول بتطير بعد الحرب