بابكر سلك
*المتأمل لكشف المريخ
*وبالتحديد خانات الوطنيين
*يجد الدنيا خلا
*ويعيد بعضنا ذلك
*إلى أن البلد ما فيها مواهب
*والكلام ده ما صاح
*المواهب راااقدة
*ولكنّا اعتدنا على الشراء بالملوة
*ما بنعزل
*بنخم ساي
*والقصة دي بتعود لعدم نجاعة أصحاب القرار
*لجنة التسيير الآن وجدت نفسها أمام معضلة كبيرة
*وبدت الحكاية دي منذ سنين طويلة
*مما بدت مجالسنا ولجان تسييرنا بقطع الأشجار الكبيرة
*قبل أن تقوم بزراعة البديل الشاب من الأشجار
*اجتثينا شجر الضل وقعدنا في السهلة
*حتى بدينا في زراعة الأشجار الجديدة
*وياريتها زي القديمة
*قطعنا المهوقني والتك والأبنوس
*وزرعنا دقن الباشا
*فلا نعمنا بضل
*ولا ارتحنا من حت الصفق
*ودقن الباشا كمان بجيب المرض للناس العندهم حساسية
*بدأ الخراب من الاستغناء عن بكري المدينة في زمن كنا بالمجموعات ونحتاج للرجل وخبرته وغيرته وبشدة
*واستعضنا عنه ببرازيلي حركتو زي صعلوك المحطة
*قبلو بس
*وما كان شطب المدينة لأسباب فنية
*ولكنه كان لاعتبارات شخصية
*وخرجنا من تلك المجموعات وتأهل من كان ينافسنا وهو في أسوأ حالاته
*واستمرت الخرمجة قدمًا
*فقدنا كوادرنا الوطنية
*شلناهم صالح (خاص) تحت مسمى صالح عام
*وطفقنا نأتي بأرباع المواهب بحجة أن البلد ما فيها مواهب
*البلد مليانة مواهب
*ولا يكفي تكدس تلك المواهب بالكشف
*بل لابد من إدارة تلك المواهب بالصورة التي تمكنها من تقديم أعلى ما تملك
*فهل أدرنا تلك المواهب بهيك عقلية؟؟؟؟
*بالتأكيد حطمناها إلى أن أوصلناها لدرجة تمني الفكاك من المريخ
*إنه سوء الإدارة
*وضعف الإرادة
*والطنقعة في فارغة
*زي مشكلة السودان
*شوف السودان تحت إدارة الإنجليز
*وشوف السودان (أو ما تبقى منه) بعد سودنة الإدارة
*ما داير أقول نحنا في حوجة لمحترفي إدارة أجانب
*لكن عايز أقول حقو نرتقي بمستويات إدارة الكرة لعندنا لمستوى الناس الفاتتنا مسافة
*يقولوا ليك فلان لعّاب لكن صعب ومستهتر
*مهما كان الإدارة الجيدة هي التي تنجح في إدارة ذلك المتمرد لتصنع منه نجمًا
*وعلى النقيض
*جيب رونالدو وميسي وكبار محترفي الدوريات العالمية
*وضعهم تحت إدارتنا السودانية
*صدقني بعد شهرين التمرين بجوا أربعة لاعبين
*وبيخسروا كورة ضد أي فريق من الدرجة التالتة
*ودونكم محترفين جونا منضبطين بعد ستة شهور بقوا ملوك الجمبات والقعدات والشلليات
*ياخ الحضري ملك الالتزام والاحترافية
*لما جانا بقي يتمرن في العرضة ويستحمي في القاهرة
*برجع بهدوم التمرين
*نحنا كدة
*ودايرين نجاحات
*المهم
*لجنة التسيير أمامها ملفات هامة
*أول حاجة فريق يعتمد على أجانب يمثلون غالبية التشكيل بفقد الغيرة
*لابد من ضم مواهب وطنية بقامة النادي وبأعمار متفاوتة
*خبرات وخبرات أقل ومواهب شابة تتلقى خبراتها عبر النادي
*وده ما بجي إلا نودع قناعة أنو البلد دي ما فيها مواهب
*راااقدة على قفا من يشيل بس من يدير؟
*عليه
*أرجو أن لا نحمل لجنة التسيير وزر من سبقوها بسنين ضوئية
*دعوها فإنها مأمورة
*ولكن في الآخر ستؤسس لنا قواعد الانطلاق نحو نجاحات ننشدها ولا نعمل لها ولا نصبر عليها
*وأرى أن اللجنة عليها الاستغناء بقوة قلب عن كل من يوجه الجهاز الفني بالاستغناء عنه
*على الأقل تخلي الكشف معقول العدد يمكن الجهاز الفني من الشغل
*أو اعملوا فريق (أ) خلوه مع الخواجة
*وفريق (ب) يرابط ببورتسودان بحيث لا يسبب ضغطًا على الخواجة ويبقى مرحلة تأهيل للفريق (أ)
*لكن بتقدروا على الصرف ده؟؟؟؟
*أيها الناس
*ما تحطم عبر سنيييين
*لا يعاد تأهيله بهذه السرعة
*ولتعلم لجنة تسييرنا
*أننا لا نريد سراميك ببيت الجالوص
*شيدوا قواعد بناء متين
*لتمهدوا لمن يخلفكم الأساس المتين ليواصل البناء
*أيها الناس
*إن تنصروا الله ينصركم
*أها
*نجي لي شمارات والي الخرطوم
*تعرف يا والينا
*كل المشكلة الفينا
*ضعف الإرادة وسوء الإدارة الفينا
*والقصة دي كان استمرت يا والينا
*صدقني من ناحية بتودينا بتودينا
سلك كهربا
ننساك كيف والكلب قال ضعف الإرادة ما بخلي الواحد فينا يحك القرادة وسوء الإدارة بغيرنا نعضي الحقنا والما حقنا
وإلى لقاء
سلك
