بابكر سلك
*الارجنتين بطلا للعالم 2022
*الارجنتين وصيفا لبطل العالم للشباب تحت سن العشرين 2025
*المغرب رابعا للعالم 2022
*المغرب بطلا للعالم تحت العشرين 2025
*الحكاية دي تفتكروا عبط؟
*حظ؟؟؟
*مكجرنها؟؟؟
*اشتروا الحكام؟؟؟؟؟
*وطبعا لا المغرب لا الارجنتين من دول المال
*لكن برغم ذلك حققو الكلام الفوق ده
*وده ان دل انما يدل علي ان المال وحده لايصنع الفارق
*يجب ان يكون في عقل يعرف يستثمر ذلك المال ويديره
*وضمير ينأي بنفسه عن الفساد
*بالذات الفساد عند ادارة المال
*تخطيط ثم تنفيذ زي ماقال الكتاب وتنسيق
*المغرب شالت كأس امم افريقيا تحت 23 سنة في 2023
*برونزية دورة الالعاب الاولمبية باريس 2024
*فضية امم افريقيا تحت عشرين سنة 2025
*كأس امم افريقيا تحت سبعطاشر سنة 2025 بطولة
كأس العالم تحت عشرين سنة 2025
*كأس امم افريقيا للمحليين 2024 بطولة
*وطبعا رابع العالم في بطولة 2022
*ده غير انجازات كرة القدم النسائية المغربية
*الكلام ده كلو صدفة؟؟؟
*يعني بطولات (تحت السن ) دي بتكون المغرب اشركت اعمار كبيييرة؟؟؟
*يكون زول الاتحاد المغربي مشي السجل المدني في الرباط وطلع ارقام وطنية للاعبين غير فيها تاريخ الميلاد مثلا؟؟؟
*منتخباتهم السنية دي يكونوا ياربي بجيبوا ليها مدربين بمعيار زولي وزولك لمدة عشرين سنة بصرف النظر عن الانجاز؟؟؟؟
*يكونوا ياربي مدربي المراحل دي ارضاءا لزولي الجاب زولك قاموا اختاروا العناصر من نادي زولي واكملوا العدد بلاعبي نادي زولي المعارين لاندية اخري بقصد التخزين؟؟؟؟
*غايتو ماعارف
*لكن المتاكد منو انو الاتحاد المغربي (طبعا اسمو ما الاتحاد)
*بشتغل لاجل نادي واحد في المغرب
*يختار لاعبيه للمنتخب
*والبفرتق يسقط اسمو سهوا عمدا من كلية المنتخب
*والبتسجل غيرو طوالي يجي المنتخب
*اها
*اتحاد المغرب مابكتفي بذلك
*كمان يودي المنتخب محل نادي زولي قاعد
*عشان نادي زولي مايتعب في التنقل والاعداد
*اعتقد دي الاسس البشتغل بيها الاتحاد المغربي وهي تشكل اسباب نجاحات المنتخبات المغربية
*لكن داير اسأل سؤال
*المنظومات الفنية والادارية للمراحل السنية والنشئ في المغرب
*بدءا من الروابط والحواري
*قالوا والعهده علي راوي مغربي معظمهم (ريادين)
*بريدوا كرة القدم موت
*عشان كدة خلقوا الجو المناسب للمواهب الصغيرة والشابة في المغرب
*و(حدس ماحدس)
*ظهروا بقوة في كل المنافسات العالمية
*لكن السؤال
*نحنا نهنئ المغرب الشقيقة
*ونهنئ كل الدول الشقيقة
*علي انجازاتها
*وياكافي البلا
*لابنغير
*لابنتغير
*ولا الحسادة الشينة دي بنحسدهم بيها؟؟؟
*نحنا لمتين تفكيرنا محصور في الاندية؟
*نحابيها للدرجة التي تؤثر سلبا علي منتخباتنا ولكنها تحقق صالح اندية او نادي بعينه؟
*لمتين نحتفل بالفوز علي البوليس وكأننا انتصرنا علي ال.. FBI?
*مدرب المنتخب المغربي قال بعد اللقاء
*سنهدي الكاس لرئيس الاتحاد لانه اول من آمن بنا
*بختهم والله
*عندهم رئيس اتحاد بيؤمن بالناشئين
*اتحادات الذين آمنوا بالنشئ كلها كدة
*اما الذين كفروا فلهم عذاب اليم
*وقال عملنا منذ سنوات طويلة لتطوير كرة القدم
*انشأت الدولة الاكاديميات والملاعب ومراكز تجميع المواهب
*عملوا استاد في سطوح
*ونحنا المدينة الرياضية اربعين سنة ماقادرين نتمها
*بل ماقادرين نحافظ علي مساحتها
*كلو يوم نضقلم فيها ونقطع منها وتقوم عمارة
*لما قامت قيامتنا
*ثم شكر جلالة الملك
*مبروك ياجلالتك والله
*نحنا بجلالة قدرنا يتحكم فينا قدرنا
*ايها الشعب المغربي الشقيق
*ماحاسدنكم والله
*لكن غيرانين
*ايها الناس
*ان تنصروا الله ينصركم
*اها
*نجي لي شمارات والي الخرتوم
*تعرف يا والينا
*المغرب دي لحدي قريب ده كانت زيينا
*بطولة امم افريقيا واااحدة يا والينا
*اسي جابت ليها كؤوس عالم يا والينا
*ونحنا ماعلينا
*بس ادينا الفصاحة والشعارات يا والينا
سلك كهربا
ننساك كيف والكلب قال قريب ده جنوب السودان حايشيل كاس افريقيا ونحنا حانهني الدولة الوليدة الشقيقة
والي لقاء
سلك
