بابكر سلك
*حضرت مباراة رسمية بين الأهلي وسيراميكا
*دوري موليد 2005
*مالفت نظري البنية الجسمانية الفاخرة والقوية للاعبين
*اقل واحد فيهم ممكن يشيل ليك خط دفاع منتخبنا الاول في ضهرو ويجري بيهم
*بسطة في الجسد لايعود الفضل فيها للكشري
*ولا يعود سبب افتقار لعيبتنا ليها بسبب الفول
*ولكن الامر برمته يعود للتأهيل البدني والفني البتوفر للاعب المصري عبر فرق السنية والتي تنتظم بدوريات مستمرة ومتواصلة
*تخيل مواليد 2005 ديل مروا بكم مرحلة عمرية تنقلوا فيها الي ان صارت اعمارهم عشرين سنة؟؟؟
*تلك المراحل التي مروا بها اكسبتهم غير القدرة الجسدية والبنية القوية اكسبتهم فنيات اهلتهم لتطويع الكرة كيفما ارادوا
*الواحد يثبت الكورة من لمسة واحدة
*ونحنا لاعبنا لما يصل المنتخب يثبت الكورة ويسكها ويحاول ثم يفشل ويسكها من جديد
*لايمكنه ترويضها من لمسة
*لانه لم يتمرن عليها منذ ان كان همسة في اذن المنشط
*مارسها كبييير
*ومن شب علي شئ شاب عليه
*ناس بتخطط وتعمل وتصل
*وناس بتخبط وتسمح بتلطاشر اجنبي في كشف الفريق يزاحمون الشعب في المواصلات
*خلي زحمة الخانات والتمدد فيها خصما علي الوجود الوطني
*وبعد ده دايرين نصل كأس العالم
*في مصر القريبة دي
*وفي منشط كرة القدم بس
*اي ناد عندو فرق عمرية محترمة وبتنافس دوريا كمان
*اتحادهم شغال وبلزم الاندية بذلك
*عشان كدة انديتهم مامحتاجة لي تلطاشر اجنبي في الكشف الواحد
*ولا اظنهم يسمحون للاعب ان ينعم بجنسية مصر (المقدسة) ارضاءا لنادي او اخفاءا لسوء اتحاد يقود الكرة للخلف
*الاشياء كلها تتشابه
*تهمل الكرة
*وتصبح الجنسية هاملة
*ثم نواجه بحقيقة ان منتخبنا كله من كبار السن
*لعيبتنا ديل في مصر بركبوا المترو بنص القيمة
*ودايرين نمشي كاس العالم
*ايها الناس
*لو داير تصنع فريق يشيل بطولة
*ساااهلة
*سجل ليهو خمسطاشر اجنبي وجنس ليهو سبعة
*موسم واحد يشيل ليك الكاس
*وبعدها الفلس يحصل
*يذهب الاجانب والمجنسين
*ويبقي الانين
*وممكن الفريق ينزل كمان
*اما لو داير تبني فريق بطولات يتواجد دائما في النهائيات
*ده شغل تاني
*داير سنين
*وداير استراتيجية وفهم اداري رفيع
*ده فيما يتعلق بالاندية
*اما فيما يتعلق بالدول
*ببقي الموضوع اكبر واشمل
*مراحل عمرية وشغل علمي ومنافسات دائمة وتأهيل منذ نعومة الاظافر
*عشان كدة نحنا بعيدين
*وكلو يوم بنبعد اكتر
*والغريبة طموحنا بكبر
*المهم
*استمتعت بمباراة الاهلي وسيراميكا مواليد الفين وخمسة
*والآن بتفرج علي مباراة الزمالك وفاركو مواليد الفين وتسعة
*اها
*لجنتنا شغالة
*واعتقد ان قراراتها فيما يخص فريق الكرة
*هي قرارات تستند علي الرأي الفني
*وده في حد ذاتو فهم متطور
*بس لو خففنا من حدة النقد دي واستعجال النتائج نكون عملنا كويس
*فادارة الكرة بالبلاد ليست مثالية ولاتقود للتطور
*وده في حد ذاتو اكبر عائق للتطور
*ربنا ينهي الحرب دي
*عشان نتفرغ للتطور ونصحو من غفوتنا التي كم حلمنا خلالها بانجازات لا نستحقها
*بعد كورة الزمالك مواليد الفين وتسعة دي حا احضر كورة غزل المحلة والاسماعيلي مواليد الفين وسبعة
*ابقوا معنا
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*بعد الحرب مابننصلح مالم نغير الحال الفينا
سلك كهربا
ننساك كيف والكلب قال ميادين الحلة كلها بعتوها لصالات افراح وخططتوها بيوت جديدة دايرين الشفع ديل يتعلموها وين يعني؟
وإلى لقاء
سلك
