بابكر سلك
*بعضنا استغرب من قصة فريق في رواندا وفرق في السودان
*الحكاية كلها تجهيز وتركيز
*تجهيز التيم الفي السودان
*وتركيز الجهد الفني مع تيم رواندا
*في ناس مادايرن
*لكن المشكلة وين؟؟؟
*والقصة دي ماجديدة
*قبل كدة المريخ لعب مباراتين في نفس التوقيت
*مباراة في كوستي
*ومباراة في الابيض
*ايام المريخ مريخ
*المريخ بمن حضر
*وايام الاحتفال باليوبيل الذهبي للزعيم
*استمرت الاحتفالات اياما عددا
*يوميا في مباراة
*واللعب امس مابلعب الليلة
*واللعب الليلة مابلعب بكرة
*المريخ وقتها بمن حضر
*احمر واصفر
*بيجي مافي
*كان المريخ بمن حضر لأن الانتقالات كانت تتم باشارة من كشيفين خبرة وفنيين خبراء
*لقيط ساي من طرف مافي
*الوكت داك اللاعب لو جيت قلت ليهو دايرين نسجلك في المريخ
*بقوم جاري
*المريخ ده كيان كبير لايمكن ان يرتدي شعارو اي زول من طرف
*اللاعب يقعد كنبة تلاتة سنين
*علي قلبو زي العسل
*هو لاقي يتفرج عن قرب علي كمال وسانتو وبشارة؟؟؟
*ينجض علي نار هادئة
*ولما ينزل الملعب يشعل النار
*المريخ كان بمن حضر لأنو كان كيان مقدس خلفه انصار لايعرفون الفرقة والشتات
*كان المريخ بمن حضر لأنو لم يوجد بين انصاره وقتها من حفر
*المعارضة تساهم بفعالية في التسجيلات
*والمعسكرات
*والحشد للتشجيع
*مريخاب المجلس مريخاب حمر
*ومريخاب المعارضة (معارضة المجلس لا الكيان) كانوا مريخاب صفر فاقع لونهم يسرون الجميع
*ماكان في محل لي لون تالت
*ماكان في مريخابي بيجي
*وكان المريخ بمن حضر لانه لم يهمل امر تعاقب الاجيال
*فلم يتخلي عن لاعب خبرة قبل ان يأتي بالبديل اليافع النافع الذي يستمد ثباته ممن سبقوه
*كان المريخ بمن حضر لانو ماباع لاعبينو ولا بقي ليهم طارد دفعهم للهروب من كشفة لكشوفات اندية اقل منه
*والآن المريخ بفريقين وليس بمن حضر
*بفريقين لتجهيزو عشان يبقي بمن حضر
*المرحلة لاتحتاج سخرية ولكنها تحتاج لتقدير جهود الرجال وتقدير مواقفهم
*واهو برضو فرصة للاعبين
*البتخاذل في رواندا يرجع السودان
*والبتطور في السودان بالرواندية ترانسيت كيجالي
*انه البناء واعادة التشييد علي ارض دمرتها حروب الانشقاق وسوء الادارة وضعف الارادة
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*الدرس الاتدرس لينا
*مافي شتات بقدم بلدا لينا
*ولافي خصام مودة ببقي لينا
*ولافي كيمان بتبقي مدينة
سلك كهربا
ننساك كيف والكلب قال نحنا الكلاب ديل وصلنا لي انو العضم البنختلف عليهو بكفينا كلنا براااااحة… قمنا خجلنا
والي لقاء
سلك
