بابكر سلك
*النقد لا يعني بأي حالٍ من الأحوال توجيه اللوم أو التقليل منه أو الإمعان في الاهتمام بالسلبيات وعمل من حبتها قُبَّة وإهمال الإيجابيات عمدًا.
*النقد هو عملية علمية يقوم بها شخص مؤهل لديه الكفاءة.
*حيث يقوم بتحليل الأمر تحليلًا علميًا.
*ويبرز سلبياته ومحاسنه مع التبرير العلمي والمنطقي.
*لذا عادي جدًا ممكن نلقى نقد خلاصته مدح العمل الذي تناوله والإشادة به.
*نحنا في (السودان) نمارس النقد على أساس أنه عمل عملية كشف العيوب.
*وإظهار جوانب العمل السلبية.
*عشان بنمارس النقد بالمع والضد.
*لذا يكون تصنيف الناقد عند الناس أنه ضد.
*وهكذا.
*لا نستفيد من النقد كعملية علمية تقوم على التحليل المحايد من مختص.
*ولكن يساعد النقد بمفهومنا على عملية تقسيم الناس للمع والضد.
*وتبقى العملية النقدية في حد ذاتها موضوعًا يستحق النقد والتقييم السليم.
*ياخ نحنا بننتقد عمل قبل أن يبدأ.
*وننتقد قرار قبل تحليله.
*فقط يكفينا للنقد معرفة شخصية إصدار القرار أو الجهة التي أصدرت القرار.
*نمارس النقد بالمع والضد.
*ننصر الشخص الذي أصدر القرار.
*ولا يهمنا القرار نفسه.
*بقينا زي الملك الزماااان.
*قالوا الحراس جَو للملك قالوا ليهو:
*جلالتك، بقرة الجنايني نطحت تورك، شرطت بطنو.
*قال ليهم: اذبحوها وشرمطوها وعلّقوا لحمها على سلوك الكهربا بجميع شوارع المملكة عشان الرعية تعرف عقوبة التنمّر والاعتداء على حق الغير في العيش السليم الآمن وسلامة الجسد.
*قالوا ليهو: عفوًا جلالتك، غلطنا، قصدنا إنو تورك نطح بقرة المزارع شرط بطنها.
*جلالتك قال ليك صنقع دنقر وقال:
*هي بقرة المزارع الجابها لي توري شنو؟؟؟
*بهذا الفهم نقوم بممارسة النقد.
*والله يتوب علينا.
*المهم، نحمد الله عندنا ألقاب دولية إقليمية، ولقب قاري قدر الضربة.
*وغيرنا… كدي خلونا من غيرنا.
*بتعرفوا (لغب) الحمار؟
*اللغب هو اللثة البتقوم فيها السنون.
*وأهلك لما يكونوا دايرينك تعرس من الأهل لكنك تختار من خارج النطاق،
*حبوباتك بشنفنها يقولن: لغبها زي لغب الحمار.
*لغب الحمار عرييييض.
*غايتو يا محمد عبد الماجد، لو غلبكم (لقب)، شوفوا ليكم طريقة (لغب).
*طالما فشلت كل أشكال أطقم الأسنان الدولارية في رسم بسمة جميلة واثقة من ألقابها.
*أيها الناس، إن تنصروا الله ينصركم.
*أها، نجي لي شمارات والي الخرتوم.
*كان شفت يا والينا، زي الملك سيد التور ده في كتاااار وسطينا.
*وبقرة المزارع المسكينة دايمًا بتدفع التمن يا والينا.
*ما في زول يوقف تور الملك في حدو؟ ما يعتدي على بقرتنا الحنينة؟؟؟
سلك كهربا
ننساك كيف والكلب قال: تور الملك مهما طال عمره يومه من ناحية بجي بجي.
وإلى لقاء
سلك
