بابكر سلك
*اذا ركبنا راس وامتطينا عجلة التاريخ رياضيا
*نجد ان الامر لايختلف اطلاقا عن واقع التاريخ في كافة مناحي حياتنا الثقافية والاجتماعية والسياسية والتعليمية وحتي شكل الدولة والتزامها امام المواطن
*دائما الامس في السودان اجمل من اليوم
*واليوم افضل من الغد
*(نرذلون) كلو عام
*ونظل نجتر في ماضينا الجميل
*لا كمحفز لحاضر اجمل ومستقبل زاهر
*ولكن نجتره كمسكن لاوجاع التدهور التي تصيبنا مع مرور اي دقيقة علي الواقع السوداني
*سياسيا نفلق ونداوي
*خلعنا عبود وعدنا نتحسر علي عهده هتافا
*ضيعناك وضعنا معاك
*وانتفضنا علي نميري
*واذا ما صرنا اليه
*اجترينا كيف انه كان شجاعا ونزيها ووطنيا
*مات في بيت ورثة بتاع نسابتو
*وهو الذي حكم السودان سطاشر سنة
*دائما نتحسر علي ماض اضعناه بايدينا
*رياضيا حدث ولاحرج
*بلد كانت المناشط الرياضية فيها تمثل منارات علي بحور الاولمبياد
*وكان التنافس الرياضي وفي كل ضروب المناشط يعج وينشط
*ليس بالخرطوم وحدها (عاصمة 56)
*ولكن في جميع ربوع سوداننا
*ونظل نتدهور لنتدهور اكثر
*وقبل ان نجعل من مشروع الجزيرة سهولا جرداء
*جردنا الرياضة من مساحاتها وتغولنا عليها
*واضحت الرياضة تدعم الدولة لا العكس
*فخرجنا عن المضمار الرياضي الي غير عودة
*وكأن المسؤولون يقفون عند باب الخروج مرددين لاي منشط خرج عن الخدمة
*الباب يفوت جمل
*واضحت وزارة الرياضة (وهي وزارة الخارجية الحقيقية)
*اضحت للترضيات السياسية.
*تأتي علي هامش الوزارات ارضاءا لي ناس الهامش دون افراد اي ميزانية لها من الدولة
*احكي ليكم قصة حصلت لي حكاها لي واحد صاحبي
*فكرنا في انشاء اتحاد لمنشط الريشة الطائرة
*كمنشط جديد يعتمد علي الفردية التي يمكن ان تقودنا للاولمبياد من جديد باقل كلفة
*فكان لابد من موافقة الوزير
*ذهبنا للوزير
*الاستاذة هنادي الصديق والاستاذ مالك جعفر والاستاذ العكدابي وشخصي الضعيف
*في الوكت داك كنت اضعف من كدة
*تخيلوا الوزير قال شنو؟
*قال لينا ماعندي مانع
*بس عندي شرط
*ماهو شرطك سيدي الوزير؟
*ان لاتطلبوا اي دعم من الوزارة
*ليه ياشيخنا؟
*لأن الدولة لا تخصص لنا اي ميزانية ولانظهر كوزارة في ميزانية الدولة
*ولكنها كتر خيرها وخدر الله ضراعها بتدينا مرة مرة عطية مزين
*طيب يا سعادتك بتشتغل كيف؟
*والله تقول شنو؟
*معناتو مابتقدر تشتغل
*ما اصلو
*طيب ياشيخنا موش من اخذ الاجر حاسبه الله بالعمل!
*اكيد
*وبما انو الدولة مابتديك ميزانية معناتو انت قاعد ساي لاشغل لا مشغلة
*طبعا
*طيب بتقبض راتب ومخصصات وعربية ليك وعربية للمدام وحرس شخصي وكشك قدام البيت فوق كم؟
*قوموا اطلعوا بره
*انتهي
*دي القصة الحصلت لي الحكاها لي واحد صاحبي
*وبعد ده دايرين بطولات بالتمني
*بطولة بتاع فنيلتك؟؟؟؟
*ايها الناس
*كان ياماكان
*في قديم الزمان
*في بلد اسمو السودان
*عشان تعمل ليك فريق كرة وتنزل الميدان
*يفرض عليك القانون ان يكون لديك عددا من المناشط كحد ادني
*قانون قديم
*زي قانون الحيوان
*وتمخض النشاط الرياضي وولد قامات
*وليم اندرية ورفاقه وكيجاب ورفاقه وخليفة عمر والكشيف ورفاقهما
*يظهر بدينا غلط
*اسي كل الفضل الناس جاريين
*لكن ما جاريين علي مضمار الاولمبياد
*جاريين في المعيشة
*جاريين مبقجين
*جاريين ورا الدنيا
*وما تقول لي جاريين ورا الدنيا ليه
*لكن اسألني
*هي الدنيا جارية مننا ليه؟
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*جاريين ورا الدنيا والدنيا جارية منينا
*الخوف تعتر لينا عمايلنا يا والينا
*ونقع علي قدومنا نكسر السن الفضلت لينا
سلك كهربا
ننساك كيف والكلب قال يا تنعدلوا يابقجوا خلوا الدنيا دي وارتاحوا
والي لقاء
سلك
