بابكر سلك
العالم من حولنا فات روووح
“ما يهمنا هنا العالم الرياضي”
مصر القريبة دي
خليها كرة القدم وفرق السنية في كل نادي ومنافساتها التي لا تقل أهمية عن دوري نايل
تعال شوف المناشط الأخرى
أي منشط
“نساء ورجال”
“رجال ونساء”
وأطفال
كرة طائرة
سلة
تنس طاولة
كرة يد
ألعاب الدفاع عن النفس
يعني كل منشط من ديل بمراحله السنية بكون فيهو ستين شابة وستين شابًا.
بي ناس القدم ومراحلها السنية بكون المجموع حوالي خمسمية لاعب
ديل كلهم عندهم أزياء ومعدات ومنافسات ومدربين
ونحنا خمستاشر لاعب كرة قدم أساسيين ما قادرين نسفرهم مع بعض
بالقطاعي
خجلنا
وغرّنا
وقربنا نصاب بالحسد لولا استغفرنا الله
ولكن نسأل:
عدنا كم ولاية؟
وكل ولاية فيها وزير رياضة
يعني وزراء الرياضة عندنا عددهم أكثر من لاعبي المناشط “إن وجدت” في كل البلد
“طاشر وقشرين” وزير غير الكبير
بصرفوا رواتب ومخصصات وسارينات وحرس، وسعادة الوزير قام وسعادة الوزير قعد، والبلد مضرب ريشة طايرة صالح ما فيها
من أخذ الأجر حاسبه الله بالعمل
الكلام ده ما بشمل وزراء الرياضة يا ربي؟؟؟؟
نحنا بلد غريبة
ستة وتلتين سنة بنبني في المدينة الرياضية
لو بنيناها بحلاوة لكوم كان انتهت
بلد العربات المخصصة للنافذين فيها قيمتها ممكن براحة تعمل ملعب أولمبي عالمي.
لكنه السودان
“أغنى دولة وأفقر شعب”
بلد المفارقات
وبعد ده دايرين بطولات قارية وعالمية
غايتو ما عارف
لكن من نعم ربنا إنو جعل نهاية للدنيا.
إن شاء الله القيامة تقوم
يظهر ما مقسوم لينا هناء في الدنيا هنا
النشوف الآخرة هناك
قبل ما نمرض بالحسد وتبقى علينا دنيا نار وآخرة نار
“أيها الناس”
“إن تنصروا الله ينصركم”
أها
نجي لي شمارات والي الخرتوم
غايتو يا والينا
“البقت فينا”
خلت القيامة جل أمانينا
سلك كهربا
ننساك كيف والكلب قال “مسكين البدا يخت أملو في باكر”
وإلى لقاء
سلك
