بابكر سلك
المنتخب أمس شرف العدو والحبيب
وكان بالإمكان أفضل مما كان بالنسبة للنتيجة
لكن من حيث الأداء
ما شاء الله
ثقة،
عارفين بعملوا في شنو
بس نقص القون
لكن من ناحية اتحفونا
اتحفونا لمن شرفونا
الجزائر اسم كبير
لكن السودان ما صغير
كنا محتاجين تمريرة قاتلة
أو مهارة فردية “قردية”
لكن معلش
قسمة ونصيب
بس التمرير الخاطئ في مرات كتيرة ما كان بشبه الأداء
بالذات في عمق الدفاع
لكن الصورة العامة جميلة
وتحية للخبير كواسي
وسلام تعظيم للجميع
ونخلع القبعات للجمهور السوداني الجميل
أيها الناس
أبوجا كيف؟؟؟
يلا نقطونا بي سكاتكم
برغم إنك يا أبوجا
تعاملت مع إحدى الكرات بليونة
وهي بالشوط التاني
الضربة الحرة المباشرة
الضربت في راس مدافعنا وجاتك باااردة
قدامك مهاجمين اتنين
تتطلع بالطريقة دي كأنك طالع تقابل حبيبتك
أبوجا تحتاج لشراسة
التشريس علم
لكن الشوط الأول كنت يا أبوجا نجم نجوم العرب
أيها الناس
أبوجا وطبنجة في التشكيلة
ارجع للزمن مرة
ارجع لما قبل النمير وجماعتو
تلقي تشكيلة الليلة دي فيها
أبوجا وكرشوم وطبنجة والجزولي
وإذا رجعت بالزمن شوية
ضيف ليهم طيفور كمان
لكن كان زمان
وكان يا ما كان
وإذا رجعت لي زمن سوداكال ضيف ليهم الغربال
دي مصيبة شنو دي الوقعنا فيها دي يا ربي؟
اللهم إن كان سحرًا فابطله
لكن شغل ما طبيعي
أيها الناس
ده منتخب الجزائر الأصلي؟
إن كان كذلك نحنا ما هينين
أيها الناس
إن تنصروا الله ينصركم
أها،
نجي لي شمارات والي الخرتوم
يا حبيبنا بارك لينا وهنينا
دخلنا الجزائر في كستبانة يا والينا
سلك كهربا
ننساك كيف والكلب قال “انتوا أبو عشرين وييين؟” إن شاء الله نشوفو في جنوب أفريقيا.
وإلى لقاء
سلك
