بابكر سلك
*الليلة داير احكي ليكم قصة حماد
*حماد ولد صغير دخلوهوا المدرسة
*مامركز
*لكن اهلو عاملين بيهو عمايل
*حماد مشي المدرسة
*حماد رجع من المدرسة
*يمشي ويجي ادوهم شنو ماعارف
*من الصباح الغيار مغسل ومكوي
*(واللنش بوكس) مستف
*حماد مشي حماد جا
*اهلو شغلهم الشاغل ايجاد تبريرات لاخفاقات حماد المتواصلة
*وجات الامتحانات
*قلم جديد وعلبة هندسة لحماد
*حماد ماشي الامتحان
*حماد جاي من الامتحان
*حماد لازم يرتاح عشان ممتحن
*جيبوا اللبن لحماد
*اقفلوا التلفزيون حماد بذاكر
*وطلعت النتيجة
*البيت كلو راجي حماد يجي
*وجا من بعيييد شايل نتيجتو
*ينطط سااااي
*فرحان
*جبت كم ياحماد
*جبت سبعين من سبعين
*وانطلقت الزغاريد
*وجات الحاجة الباردة والحلويات
*رجال الحلة يعرضوا
*ونسوان الحلة يزغردن
*واحد شال النتيجة يشوفها
*لقاها ليك زي طبلوم العربية العلي الزيرو
*كلها اصفار
*سأل حماد
*انت قفلت شنو يا حماد
*حماد اشر ليهو علي محل الترتيب
*وقال ماشايف دي سبعين من سبعين
*واسرع اهل حماد في ايجاد الاعذار بعدما ادركوا الحقيقة
*حماد شاطر لكن ماركز
*حماد الضراهو وفات حبوبتو قبل الامتخانات بستة شهور
*حماد مامهتم لكن كان اهتم هيييي يكا
*حماد لسة صغير اصبروا عليهو
*العيب في المدرسين مافي حماد
*وحماد ولاشغال الشغلة
*ماشي يمتحن المرة دي في المغرب
*قال المنهج العربي ده مانافع معاهو
*منهج متخلف
*ماشي علي منهج ناشونال
*لكن العزاء الوحيد انو حماد جلي فكرة المنهج الانترناشونال
*كان مصر عليهو شديد
*ويمضي حماد في خمومو ورمومو طالما اهل حماد يجدون له الاعذار
*وحماد قفل الترتيب
*السبعين من سبعين
*ايها الناس
*الرياضة علي وجه العموم
*وكرة القدم علي وجه الخصوص
*لم تعد هواية
*بل صناعة ودراسة وعلم يدرس
*وامثال حماد بنهجهم هذا لن ينافسهم طالب في قفيل الترتيب
*والغريبة اهل حماد جايبين ليهو مدرس خصوصي
*المدرس الخصوصي ذاتو بعد شهر دقوا ليهو الباب
*قال ليهم بتدورو العواااااض
*غايتو حماد مجوبكها ومكرشمها ومغربلها ومأرنقها
*وداير ينجح
*ايها الناس
*ان تنصروا الله ينصركم
*اها
*نجي لي شمارات والي الخرتوم
*بالطريقة دي مابتمشي يا والينا
*يانعمل الشغلة زي ما الكتاب قال لينا
*يا نبطلها احسن لينا
سلك كهربا
ننساك كيف والكلب قال المغرب بعدو العشا والنوم
والي لقاء
سلك
