بابكر سلك
*شينة كورتنا ياعوض دكام
*شيعيرية حراستنا ياعوض دكام
*ميتان راس حربتنا ياعوض دكام
*بالنظر دفاعاتنا ياعوض دكام
*بتتحاور محاورنا يا عوض دكان
*بالصدفة صناعة لعبنا ياعوض دكام
*ايها الناس
*قصة نشيل كاس افريقيا دي ماقاعدين نناقشها
*العارف عزو مستريح
*المجنون البطقع في الشارع ماخاتي احتمال زي ده
*لكن نفترض جدلا يعني
*مجرد افتراض
*اننا دايرين ننظم النهائيات عندنا
*الكاف حايضحك لما يتفنقل لو قدمنا ليهو طلب زي ده
*حايقول لينا انتوا قايلنها نهائيات ليدو؟
*تختوا بمبرين وموبايل وتقيلوا؟؟؟
*وينا ملاعبكم؟؟؟؟
*وتنط ليك الفيفا
*تنظموها؟؟؟؟
*وينا فنادقكم؟ وينا شوارعكم؟ وينا كهربتكم؟؟؟
*تنظيم نهائيات لو بقي تنظيم نسل انتوا ما مؤهلين ليهو
*لاملاعب لافنادق لا اماكن جميلة تزورها البعثات وتاخذ فيها صورا تذكارية
*ولا اي شي
*ياخ الجماهير البتجي تشجع دي تنزل وين؟؟؟
*فاصلة مصر والجزائر لمدة يومين بس لم يتوفر سكن للجمهور
*فسكن حول الاستاد
*تنظموا شنو؟؟؟؟
*انتوا دايرين الشركة الناقلة لما تمشي علي الجمهور تجيب ست الشاي بي منقدها علي المدرجات وسيد القصب حايم؟؟؟
*وواحد هناك من ذوي السكري رافع جلابيتو ومقبل علي الحيطة يقضي حوائجه دون كتمان؟؟؟؟
*والنور يقطع
*والكورة تقيف
*والكاف يزعل
*والفيفا تقول للكاف غلطانه انا الوافقت ليك علي قبول العشوائية والعصور الجاهلية دي
*والغريبة كل النهائيات
*عربية افريقية عالمية
*تلقي ناس اتحادنا مجعوصين علي المقصورة
*لابغيروا لابخجلوا لا بأملوا لابتأملوا
*ياخ حسادة ساي مابحسدوا
*عدم احساس في خط التماس
*ومن هناك وعلي الخرمجة في الاتحاد
*في انتظار سفرة جديدة
*عليه
*زول مابقدر ينظم نهائيات مايحلم بي بطولة
*لانو الحاجات مرتبطة ببعضها ولا تتجزأ
*بارك الله في النهائيات عشان سمحت لينا بالمشاركة
*اصلن تلاتة مباريات مبرمجات ومحددات ومعروفات
*والفيهو البخور انشم من بطولة العرب
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*قصة الزول الداير يعرس بقت فينا
*قالوا ليهو جاهز يا اخينا؟
*قال جاهز منذ حينا
*عندك شيلة؟
*جايبة لي ود خالا لينا
*والمال؟
*اخوي مغترب بسدد لينا
*وحق شهر العسل؟
*صديق متبرع لينا
*وجاهز كيفن يا اخينا؟؟؟؟
سلك كهربا
ننساك كيف والكلب قال ممكن تستضيفوا نهائيات ام الحفر…. في دي ملاعبكم كتييييرة
والي لقاء
سلك
