بابكر سلك
*الثقة بالنفس هي وقود النجاح
*وما احلى النجاح بعد الفشل
*اجمل عبارة ممكن تتقال
*شكرا للفشل الذي علمني النجاح
*نحن في المريخ يجب ان نعترف في نقد ذاتي
*بأننا ادمنا الفشل منذ سنوات
*ماداير اعيد واكرر اسباب الفشل والاحتراب والكيمان
*لكن داير آخد الفشل كنتيجة حتمية للحاصل عندنا وكنتيجة نعيشها واقعا افقدنا الثقة حتى في انفسنا
*الوضع المحبط ده حولنا لكائنات لا تثق بانتصار المريخ حتى بعد صافرة النهاية
*صنع منا امة تفقد رشدها مع اول خمسة دقائق من بداية اي لقاء
*ففقدنا الثقة حتى بانفسنا
*وكأننا كنا نتوقع عودة سريعة بعد مجزرة التخلي عن اعمدة الفريق الاخيرة
*واذا عدنا للتاريخ نجد اننا مررنا بنفس المجزرة منذ الفين وتلاتة وحتى الفين وتمنية
*خمسة سنين نقوم ونقع ولم نجني فيها شيئا
*ودي الخمسة سنوات التي خسرنا فيها الممتاز تواليا
*بعد ان كسبناه تلاتة مرات تواليا قبل المجزرة
*ماقمنا حيلنا الا بعد مجهودات كبيرة
*وقتها وصلنا لدرجة هتفنا فيها
*مادايرين مقصورة دايرين كورة
*خمسة سنين جربنا فيها حوالي مية لاعب حتى وقفنا طولنا
*ومرة تانية
*عملنا مجزرة راح ضحيتها جيل مانديلا
*وتعال شوف الاربعات الادونا ليها
*مريخ بورتسودان الحبيب ادانا ليها دوريا
*وتعال شوف المتواليات التي قربت تحطم الرقم القياسي لمتوالياتنا التمنية
*ده كلو عشان الاستغناء عن اعمدة التيم بدون دراسة
*ذهب ابراهيم عطا نجم الموسم وكمال وعاطف
*وصعدنا حاتم وقورماهيا
*ولم يكن معهما خبرة تثبت اقدامهما
*فتعلما بحقهما
*واخدنا سنين حتى نهضنا
*فلماذا الآن نتشالق ودايرين نقيف طولنا في خمسة دقايق؟؟؟
*فقد الفريق اعمدته الاساسية مع بعض
*وبقي يلملم ويجرب ويقوم وسرعان مايقع
*هذه الحتة لن نخرج منها بين يوم وليلة
*محتاجة صبر وعمل دؤوب وصبر
*واعتقد ان نجاحات الفريق داخليا. وعربيا في عهد سوداكال
*كان سببها الاساسي عقوبات الفيفا التي حرمتنا من التسجيل في فترات
*انجبرنا معها على الصبر على الخامات العندنا فقوي عودها واتت بثمارها تعجب الناس
*عشان كدة غير العمل المنهجي والصبر ماعندنا مخارجة من هذا النفق الذي لايكون في آخره ضوء الا بالصبر الجميل
*علي الاقل نعيد ثقة الجمهور بي نفسو ليكتسب اللاعبون الثقة بانفسهم
*لكن مع هذه الحرب الاسفيرية لا حانكسب ثقة بانفسنا ولا حايكتسب الاولاد ثقة بانفسهم
*لان اللاعب يستمد ثقتو بنفسو من تشجيع الجمهور ومساندته له
*ايها الناس
*انا اعتقد ان سبب التوتر الحاصل للكتير مننا
*هو مستوي الند ونجاحاتو وضمو لمواهب مهولة
*لكن يجب ان لا ننسي انهم يبنون بجدية ليهم خمسة سنين
*ونحنا يادوبك حفرنا الساس
*وحلك لما الشئون الهندسية تجيز الخرط وتتطلع لينا تصريح المباني
*نعم الند اليوم وصل مرحلة متقدمة من البناء
*ولعل ذلك يعود لصبرهم (كفاية قاعدين علي صفر احر من الجمر تسعة وتسعين سنة)
*ويعود لعدم محاربتهم لاولادهم
*ياخ ديل وقفوا مع (هليفة) واسامة التعاون دهر من الزمان وصنعوا منهما مدافعين
*ياخ ديل لي اسي بشجعوا ياسر مزمل
*صبر اكتر من كدة كيف
*ولعل انتصارهم بالتمنية بالامس قد ارعب بعضنا
*لكن لكل مقام مقال
*عشان كدة الناس الشغالة بمقولة
*سجمنا كلود هجمنا
*حقو يغيروا مفهومهم ويتذكروا انو نحنا جكسا ماهجمنا
*لانو ثقتنا بانفسنا كانت كبيرة
*فهل نطالبهم باستعادة تلك الثقة عشان مشروع البناء يمشي صاح؟؟؟
*ايها الناس
*علي لجنة التسيير، ان لاتعتمد علي الصبر بس
*في حوجة لخامات محددة في خانات معينة اضحت واضحة للعيان
*يجب اكمالها مع ممارسة الصبر الجميل
*لان اهمالها حاليا
*بالتاكيد سيأخر عملية البناء
*ايها الناس
*ناس سجمنا كلود هجمنا
*ماتنسوا
*كلود ورفاقه الميامين لسة يعيشون تحت وطأت الصفر الحير الطب والطبيب
*ماتشتغلوا بيهم
*ماتفرحوا لهزيمتهم
*كدة بكون تعصب سلبي
*وهو ان توجه جهودك لهد الغير
*تعالوا لرحاب التعصب الايجابي
*وهو ان توجه جهودك لتطوير نفسك
*المهم
*تمنية يامفترين!!!!
*الجاز وصل رواندا ولا شنو؟؟؟
*مهلا
*فانه عهد الطاقة الشمسية
*وفيه حفاظ علي البيئة
*البيئة التي تضررت تلوثا من مخلفات الجاز
*يقطع الجاز ويقطع سنينو
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*مهما قالوا لينا
*مهما حفروا لينا
*مهما طلت علينا المدينة حزينة
*موش حانموت الله يخلينا
سلك كهربا
ننساك كيف والكلب قال قلتوا لي سجمكم منو الهجمكم؟؟؟؟
وإلى لقاء
سلك
