بابكر سلك
*دوت صافرة النهاية
*وكانت النهاية
*النهاية الجد جد
*وده ما الخبر
*الخبر انو الحبيب محمد عبدالماجد اشتاق لفطور وشاي والدتو عليها رحمة الله
*محمد ده من صغير مبتلي
*ومع كل هزيمة والدتو العظيمة كانت بتجهبز ليهو وجبة وكباية شاي عشان تخفف عليهو
*قالوا مرة الهلال لاعب ضد مازيمبي (بتاعت الخماسية)
-*قال الحاجة من صباح الرحمن دخلت المطبخ
*قالت اخير لي انتهي من اسي
*بالليل بعد الكورة المطبخ ده ما بتدخل
*الحاجة عرفتها بدري
*ومحمد عبد الماجد ماكان جايب خبر
*كان فاطي سطر
*كان بردد افريقيا ياهلال
*وبعد الكورة شهر بكتب عن غناء عثمان حسين وابداع حسين بازرعة
*المهم
*المحاولة التي انفجر بركانها دي
*كانت المحاولة رقم ستة وتسعين
*والناس ديل لسة بحاولوا
*في زول غاشيهم
*ده منو الغشاكم و قال ليكم في ضوء في آخر النفق؟؟.؟
*البلد دي ضوها وااااحد
*اسمو مانديلا
*وحيد
*وفريد
*مافريد الببيض
*فريد في مكانتو
*امشي لأي وداعية
*عشان تعرف الحاصل
*لكن لازم تعرف اول شي لغة الودع
*الوحيد معناها مانديلا
*تالتة اخواتها دي سيكافا
*في سيكافا ون وتو وثري
*ولو الوداعية قالت ليك بت الصرة
*طوالي تعرف انو دي دبي
*اما لو قالت ليك التغيانة
*اعرفها قاصدة الشارقة
*ولو قالت ليك محمدك
*اعرف بل اجزم انو الزعيم علي موعد مع جوية جديدة
*ولي كشكشيه
*شوفيهو لي لو فيهو شي
*لو فيهو شي يبقي حقنا
*ولو مافيهو شي ماتختشي
*لو مافيهو شي يبقي صفر
*والصفر ماتبعنا
*لو مافيهو شي يبقي في ضوء آخر النفق
*اقعدوا ياخالد عزالدين تابعوا الضوء في آخر النفق
*لما النفق يتهد عليكم
*طوووالي ماسكين في ضوء في آخر النفق
*لما بقيتوا تحت الارض اكتر من مترو الانفاق
*غايتو الصفر كمقياس عالمي مابنشكك فيهو
*لكن تحت الصفر ده تجمد عديل كدة
*المهم
*ايها الناس
*لما يكون نجم المباراة حارس مرماك
*ده ملخص لحالك اثناء المباراة
*ولما يكون الحارس نجم المباراة ده( ببيض)
*ده ملخص للمباراة ذاتها
*زول يكاكي من الدقيقة الاولي يبيض الدقيقة ستة وتسعين؟؟؟
*اجي يا البرفس!!!!
*المهم
*ريحة المطار ناس محمد عبدالماجد مابعرفوها طبعا
*شموها وين عاد
*عشان كدة يتخطوا جاموس الجنوب بالتحكيم
*يقولوا ليك ريحة مطار
*افريقيا ياهلال
*السنة دي فلقونا زيادة
*وكتروا المحلبية
*وزودوا بوريهم(العفن) ده
*تتذكروا نكتة الحاجة الركبت تكسي ابو روف والسواق كان الزومة ضايقي؟
*ده ياهو البوري القاصدو ليكم
*المهم
*السنة دي زودوها
*قالوا الاميرة السمراء قبلت بيهم ورجلها فوق رقبتها
*خمسة وتسعين سنة يطلبوا ودها تقول ليهم دايرة اقرأ
*السنة دي مع ضعف مستوي البطولة
*قالوا الاميرة السمراء وافقت
*قبلت بيهم وخلت القراية
*ناس قالوا جنت ومابراها
*والحمد لله ربنا اعادها لرشدها
*لبست هدومها وشالت شنطتها مشت مدرستها
*من المغرب بتقعد تذاكر
*المغرب دي كيف يا محمد عبدالماجد؟؟؟
*يظل مانديلا وحيدا كلما كشكشوا ودع في البلد دي
*المهم
*الزعيم يسير بثبات علي طريق العودة للمنصات
*المنصات الجوية
*عائدون لنستنشق ريحة المطار من جديد
*بفضل الاستقرار الذي بدأ يبسط نفوذه علي واقع الزعيم
*والموسم القادم سندخله بشعار
*ست الودع ارمي الودع لي كشكشي شوفيهو لي لو فيهو شي ماتختشي فلن تجدي صفرا في آخر النفق
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*جماعة كدة هيلنا
*قالوا شايفين ضوء آخر النفق يا والينا
*اريتو يضوي ليهم يا والينا
*فاحلامهم جزء من ماضينا
سلك كهربا
ننساك كيف والكلب قال الماعندو قديم ماعندو جديد…. خلونا من النفق والضوء واقعدوا في واطات الله دي
والي لقاء
سلك
