سنوية الشيخ نيلسون!!

بابكر سلك

*نحنا أمة صوفية المنشأ.
*والتربية.
*والسلوك.
*لذا تجد بصمة الصوفية فينا واضحة.
*في سلوكنا.
*في تقاليدنا.
*في فهمنا.
*في احترامنا للكبير.
*والما عندو كبير.
*يشوف ليهو كبير.
*والكبير في السودان.
*الأخ بين أخوته.
*الأب في أسرته.
*الجد على مستوى العائلة.
*شيخ القبيلة على مستوى القبيلة.
*كبير الرقعة الجغرافية وهي الحلة أو القرية أو مجموعة الحلال.
*وهو العمدة أو الشيخ أو الشرتاي أو أي مسمى آخر.
*في الأصابعين دي عندنا الكبير.
*حتى في المصارين عندنا كبير أخوانو.
*والأكبر من ديل كلهم شيخ الطريقة.
*منتهى الاحترام والطاعة والولاء.
*الشيخ ده بتتعمل ليهو سنوية.
*مديح وولائم ولقاءات وفرح.
*الناس بتستنى السنوية دي بفارغ الصبر.
*احتفال عديل.
*اسمها الحولية.
*جاية من حول.
*ونحن كذلك.
*نحنا في مسيد شيخنا المريخ.
*وكحيران ومريدين مخلصين.
*ننتظر دومًا بفارغ الصبر الحولية.
*وفي الطريقة الواحدة بتكون في كم حولية.
*حولية المكنة الكبير مؤسس الطريق.
*حولية الخلفاء الذين أعقبوه.
*ونحنا حوليتنا الكبيرة طبعًا مدورة من 1908.
*بتكون دائمًا في نوفمبر.
*بعد داك عندنا سنويات بحمد الله كتيرة.
*حولية بدون تعادل أو هزيمة.
*ودي في العالم كلو بنحتفل بيها نحنا وناس تانيين بس.
*في كل العالم.
*وحولية بتعادل واحد.
*وحولية السبتين.
*وحولية الشيخ دبي راجل الزمالك.
*وعندنا كم حولية كدة صغار.
*بالنسبة لغيرنا كبار جدًا.
*حولية الشيخ سيكافا ون.
*تنزانيا دار السلام.
*الشيخ اسمو الشباب.
*دي من ستة وتمنين.
*وحولية سيكافا تو.
*دي شيخها مدفون بأم درمان.
*وسيكافا ثري.
*شيخها دفنّاهو قبلو في بورندي.
*وحولية راجل الشارقة.
*الحير العرب والأفارقة.
*ودي يشهد عليها الشيخ زايد الخير لما كانت إمارات خير.
*ولكن أكبر حولياتنا.
*حولية الشيخ نيلسون.
*الشيخ نيلسون ود الشيخ مانديلا سليل النضال والانعتاق والعدل والمساواة.
*شيخ نيلسون قائد ركب الانعتاق الإفريقي.
*زوج الشيخة ويني.
*رمز التسامح والتسامي والقيم الفاضلة.
*أبوي الشيخ نيلسون ود أبوي مانديلا.
*دي بقت حولية معتمدة ومسجلة في جميع ألواح خلاوي الشرف في إفريقيا.
*ومن غيرنا ظهر اسمه هناك.
*حولية مشهودة.
*لا ينكرها إلا الذين لا يدركون كنه صوفية الإنجاز وعدم الانحياز.
*فيتناولون الأمر بسفسطائية.
*والسفسطائية في تعريف أهلنا الصوفية.
*هي القدرة على الإقناع بدل البحث عن الحقيقة المطلقة.
*وهي إقناع للعامة بوجهة نظر السفسطائي وإبعاد العامة عن الحقيقة المطلقة.
*والحقيقة المطلقة تقول أن أبوي الشيخ نيلسون ود أبوي الشيخ مانديلا.
*شيخ تعترف به جميع إفريقيا ولا تجادل في مشيخته.
*لذا كان اعتماد الطريقة النلسونية الماندلية المريخية.
*طريقة معترف بها مبجلة محترمة واقع وحقيقة ولا عزاء للسفسطائية.
*هذه الطريقة النلسونية المريخية تقيم حوليتها السنوية في ديسمبر من كل عام.
*التاسع من ديسمبر يوم الحولية.
*لذا تنشط السفسطائية من بداية ديسمبر وأواخر نوفمبر من كل عام.
*في الترويج لمواضيع تشغل بها الناس عن الحقيقة.
*وهي حولية الشيخ نيلسون.
*فتكثر نشرات على شاكلة.
*الروليت الإفريقي.
*التصنيف الجديد.
*نقاط الفرق.
*ترتيب زيد وعبيد.
*والغريبة بنشروا مثلًا.
*الأهلي القاهري في المركز الأول بتسعة وستين نقطة.
*له أطناشر بطولة إفريقية.
*أربعة أبطال وتلاتة كؤوس “عمك الشيخ نيلسون ياخ” وواحدة كونفدرالية.
*الترجي كذا نقطة كذا بطولة.
*وهكذا.
*وعندما يصل السفسطائية للسفسطائي يكتبون الحقيقة لأول مرة في التقرير.
*لا بطولة.
*صفر بطولات.
*وهنا تظهر حقيقة الانتشار والكتابة عن التصنيف.
*وهو في حقيقته إبعاد الناس عن حقيقة شياخة الشيخ نيلسون والاحتفال به في سنويته.
*وشغلهم بهكذا وهمات.
*ألم أقل لكم أن السفسطائية هي إقناع الناس بأي كلام لا البحث عن الحقيقة المطلقة؟
*أها دي الحقيقة المطلقة.
*حقيقة لماذا ينشط السفسطائيون في ديسمبر من كل عام.
*ورغم ذلك تمضي حولية العارف عزو الشيخ نيلسون بن الشيخ مانديلا.
*كيف لا وهو الشيخ الوحيد المعتمد لدى العالم في البلد دي.
*السنة دي كمان.
*الحولية ببورتسودان.
*والقضارف.
*وقطر.
*الشيخة موزة ذاتها مريدة.
*والسنة الجاية كان ربنا أحيانا.
*حولية الشيخ نيلسون حتكون في جميع عواصم العالم.
*والسفسطائيون من الليلة يشوفوا ليهم موضوع يشغل الناس عن الحولية.
*يجهزوا حولية للشيخ القاطعنوا من راسهم.
*شيخ الكونغو مرقنبو قرنبو.
*شيخ التصنيف الصفري.
*المهم أي موضوع يشغل الناس.
*المهم.
*هناك بعض الصوفية يطلقون على حولية الشيخ نيلسون.
*حولية الشيخ الجوي.
*والصوفية تطلق الألقاب دائمًا على مشايخها لإثبات التفرد والوصول.
*الشيخ الحفيان.
*الشيخ العريان.
*الشيخ أبو كساوي.
*والآن الشيخ الجوي.
*الفي لوح الشرف الإفريقي بضوي.
*أيها الناس.
*كل سنة وانتوا طيبين.
*وربنا يعيدوا على خير.
*ويا الشيخ الجوي.
*دبل ليهو.
*كيتا على السفسطائية.
*أيها الناس.
*إن تنصروا الله ينصركم.
*أها.
*نجي لي شمارات والي الخرتوم.
*كان شفت يا والينا.
*فخورين جدًا بماندلينا.
*ودايرين ندبل ليهو.
*رأيك شنو يا والينا؟

سلك كهربا:
ننساك كيف والكلب قال بتدبلوا ليهو لو درتو والما عندو قديم ما عندو جديد.
وإلى لقاء.