محرجين مع الحور العين

بابكر سلك

*تاني من جمالنا رحل زول جميل.
*رفقًا يا مآسي.
*نحنا الفينا مكفينا.
*في كل لحظة من بلدنا يرحل زول جميل.
*لكن أن يرحل من جمالنا زول جميل.
*دي كتيرة علينا.
*دينق قوج.
*المثقف.
*اللبق.
*البسام.
*عاشق السلام.
*زول وئام.
*انتصر على القرار السياسي.
*وربطته مشيمة إحساسه بالوطن الكبير.
*وزادته الحدود السياسية التصاقًا بالوطن الكبير.
*مليون ميل دون نقصان شبر واحد.
*شخصية جسدت صديقنا منقو.
*جسدت شنو.
*أثبتت إنو منقو واحد مننا.
*همو همنا.
*منقو أريتو منقو الهنا.
*منقو.
*دينق قوج.
*رحل عننا.
*رحل وهو لم يبذر كل بذور الوحدة وعدم الاعتراف بالقرار السياسي البغيض.
*رحل وترك فينا بصمة وبسمة وأمل جديد.
*عاش إنسانًا بكل إنسانية.
*ورحل تاركًا فينا بعض إنسانية وبسمة.
*علها تذكرنا.
*بأن السلام غاية.
*وإن الخصام ينتج شقايا.
*وإن الحدود لا تعوق سريان المحبة بين العشاق.
*كان مثاليًا.
*ويكفي أنه سوداني الانتماء ومريخي الهوى.
*سنقرأ روايتك موسم الهجرة للجنوب كل صباح يا دينق.
*اللهم أجرنا في مصيبتنا.
*وجهجة باكات من فصلنا.
*منقو قل لا عاش من فصلنا.
*أيها الناس.
*لا زال ليل المريخ طفلًا يحبو.
*ما في بصيص أمل لنهوض طفلنا الحب.
*ومحاولته المشي لي قدام.
*ليلحق بالركب.
*أهو.
*الناس تحبط.
*تجوط.
*تتناقش في الميديا.
*تكتب بمداد الدم كي يزول الهم.
*والحال في حالوا.
*الجمل ماشي.
*والزمن بجري.
*وجملنا ده لو صبرنا عليهو.
*الخوف نصبح نلقاهو مرقنا في الهند.
*لا جديد.
*مجرد أمل ينعشنا.
*لا جديد.
*نتوق لرؤية الوطن المريخ على مقام يستحقه ويناسبه قبل ما نشتت.
*الموت بقى ألفحك ألفحك.
*الصباح الصباح.
*صباح شنو.
*الموت بقى طول اليوم.
*وسبب ما دايروا.
*زمان بعزل.
*بنقي البشيلهم.
*أسي بقش أي زول.
*لذا قبلما يقشنا.
*كنا نمني النفس بشوفة المريخ في العلالي.
*ولو نظرة وداع.
*أسي لو حصل أمر الله.
*ومشينا هناك.
*وبرحمة الله دخلنا الجنة.
*نقول للحور العين شنو؟
*نودي وشنا وين؟
*نقول ليهن خلينا المريخ مترنح في الدوري الموريتاني؟
*نقول ليهن آخر مرة شفنا المريخ تلاتة باصات ورا بعض ما بلعبها؟
*وكان قالن لينا ليييه لكن؟
*نقول ليهن لأنو المجلس رفض يقيل المدرب؟
*ولا نقول ليهن لأنو المدرب رفض يقيل المجلس؟
*وكان سألننا وين لعيبتكم؟
*نقول ليهم طفشوا؟
*ولا المجلس طفشهم؟
*ولا المدرب طفشهم؟؟؟
*وكان قالن لينا طول عمرنا ده بنسمع بمدرب بتغير عشان الفريق.
*لكن ما سمعنا بفريق بغير لعيبتو عشان المدرب.
*نطير وين عاد!
*حرج مع الحور العين ما بعدو حرج.
*في الجنة دي دخلتونا جوة أضافرينّا.
*نزوغ يعني؟
*نمشي النار؟؟؟
*نار شنو يا زول.
*وكان قابلتهم هناك تقبل وين؟؟؟
*والحل؟
*الحل في شنو؟
*الحل في هل!
*ولا ماهل؟؟؟
*غايتو بالطريقة دي.
*شهر تاني.
*المريخ لو قام حيلو.
*إلا يقوم بعاتي.
*وقلناها.
*علي الطلاق ما ضدكم.
*ولا بنحفر ليكم.
*ويشرفنا جدًا تنجحوا في المهمة.
*فنحن لا يهمنا من يحكم المريخ.
*ولكن يهمنا كيف يحكم المريخ.
*وكيف حال المريخ.
*أيها الناس.
*يا اشتغلوا نشيلكم فوق راسنا.
*يا ما تشتغلوا نشيلكم من راسنا.
*أحرجتونا مع الحور العين.
*أيها الناس.
*إن تنصروا الله ينصركم.
*أها.
*نجي لي شمارات والي الخرتوم.
*كان شفت يا والينا.
*كمل الصبر الفينا.
*ما في إغاثات صبر تدينا؟
*ولا نعيش بجاز مصافي الصبر يا والينا؟؟؟

سلك كهربا:
ننساك كيف والكلب قال قصدكم الجنة الفي الآخرة ولا الجنة الفي الراس؟

وإلى لقاء.

سلك.