يعني نمشي ليهو الموردة؟

بابكر سلك

*اتفق المريخاب.
*وأهل المريخ.
*ولأول مرة يتفقوا.
*اتفقوا على عدم قدرة سوليناس على تقديم أي إضافة للمريخ.
*لكنهم اختلفوا حول مدى الضرر الذي يمكن أن يعود على المريخ حال استمرار هذا السوليناس.
*فالمريخاب يرون أن الراجل ده ممكن يودينا الخور.
*وأهل المريخ يرون أن سولي بودينا قبل الخور بي شوية.
*ما بكبنا جوة الخور.
*والخور بقول جيد لي أنا ويا بختي.
*لا أقدح في تأهيل سوليناس العلمي.
*ولكن ليس كل عالم باستطاعته أن يوصل علمه للغير.
*فمهارة توصيل العلم للغير هي مهارة فطرية ما بقروها.
*ويجب أن تكون معها مهارة القيادة التي تكسبك التفاف الناس من حولك.
*ومهارة الإقناع التي تختصر عليك زمن التلقين والتعليم.
*والمحبة من الله.
*وكذا القبول.
*الانضباط لا يعني العذاب والعجرفة.
*فغارزيتو مثلًا كان منضبطًا جدًا.
*ورفع درجة الانضباط عند اللاعبين بحرفية عالية.
*لم يرفعها بالضغوط والعقوبات والعجرفة.
*ودي الحكمة المطلوبة في القائد.
*والرئيس يمكن أن يكون أي شخص درس الإدارة وتولى مهام رئيس العمل.
*لكن الرئيس القائد لا يكتفي بالتأهيل العلمي.
*ولكن تكون لديه مهارات فطرية لا تدرس بالكليات.
*ولكنها بالفطرة.
*نعمة من نعم الله.
*تجعل من الرئيس القائد مديرًا محبوبًا من قوى العمل.
*وتعطي للعاملين إحساسًا بأنهم شركاء في المنشأة لا أُجراء.
*فيتفانون في العمل بحب.
*ويكون الإنتاج فائقًا على الخيال.
*فهل سوليناسنا ده رئيس قائد أم مجرد رئيس؟؟؟
*طيب اتفقنا إنو الزول ده ما بقدمنا.
*ونفترض ما بدهورنا.
*نشيلوا كيف عشان نتقدم؟
*البعض يقول أن عقد الرجل به شرط جزائي يخبِّل.
*والبعض الآخر يقول أن راتب بقية العقد هو ما يستحقه حال إقالته قبل نهاية العقد.
*وكان القصة دي ولا ديك بتكلفنا كم ما في زول عارف.
*لأن البعض يقول بأنه لا يوجد شخص يعلم بشروط العقد لأنو ما في زول شافو.
*حتي أعضاء المجلس يقول بعضهم بأنهم لا شافو العقد ولا حضروا العقد.
*يعني عقدوا كوتّيمي؟
*عقدوا عرفي يا ربي؟
*ولا الزول ده دخل علينا سااااي؟؟؟
*طبعًا المجلس غير ملزم يورينا بنود العقد.
*لكن لإزالة اللغط والإحباط كان عليهم أن يوضحوا لينا حجم الكارثة.
*مثل دارفوري بقول.
*جراداي في سروال ولا بعضي إلا قعادو شين.
*ونحنا كمان بنقول سوليناس ولا بقدم إلا قعادو في سروالنا شين.
*حامينا النوم والله.
*لا تعرف تتحكة.
*ولا تعرف تتفكة.
*مساهرين الليل كلو مع قعادو الشين.
*وليس عيبًا أن نفشل في اختيار مدرب لأي سبب من الأسباب.
*ولكن العيب أن نكابر ونستمر في الفشل.
*قد تكون بيئة المريخ غير مناسبة مع الرجل.
*وقد تكون خامات اللاعبين ومهاراتهم لا تمكن الرجل من تقديم شئ.
*وقد تكون هناك أسباب أخرى.
*ولكن كلها تصب في أن هذا الرجل ليس الأنسب في هذه المرحلة.
*أيها الناس.
*نحنا مقتنعين بضرورة بناء فريق على أسس معقولة وطموحة وعلمية.
*وعارفين إنو البناء بياخد زمن طويل.
*والقصة دي دايرة صبر.
*ما اختلفنا
*لكن البناء بظهر من الساس.
*فإن كان الساس معوجًا.
*يجب أن لا نحلم بحائط دوغري.
*والبناء الفاشل يظهر فشله من أمتار البناء الأولى اعوجاجًا.
*ولما تقول ليهو حيطتك دي معووجة يا معلم.
*يقول ليك البياض بجيبها.
*ولما تصل مرحلة البياض ويظل الاعوجاج.
*تقول ليهو لسة معووجة.
*يقول ليك شنو؟
*تقول ليهو لسة معووجة.
*يقول ليك وين؟
*تأشر له هنا.
*يقول ليك طوبكم ما سمح.
*جبتوا لي طوب ني وهش وملولو.
*وإذا قلت ليهو هاك القروش جيب الطوب براك.
*حا يجيب ليك طوب في مصاص ما يشتغل.
*وتبقى أمام أمر واقع.
*يا تقبل بنيانك معوج ومعولق.
*يا تكسر وتبني من جديد.
*لكن من وييييين؟؟؟
*الآن سوليناس ببني ليهو سبعة شهور.
*الساس معووج.
*والحيطة مايلة.
*وإن لم نعالج البناء في هذه المرحلة.
*حقو نسقف على كدة ونشوف لينا دار رياضة أم درمان تلمنا.
*ويستمر قعاد جراداي جوة سروال.
*قعادها شين.
*قعادها سمح.
*حا تكون قاعدة.
*ونسأل الله الستر.
*أيها الناس.
*الهلال أضاف لخبرة بشة علمًا
*وها هو بشة يضيف بعلمه للهلال محترفين على مستوى.
*تخطيط.
*يثبت أننا في المريخ لا نعمل كمنظومة منهجية تؤهل كوادرها وتطورها لأجل الكيان.
*يعني القصور قبل النمير بكتييير.
*ومن كل مجتمع المريخ.
*النقوم على جراداي.
*عذبتني شديييد.
*أيها الناس.
*إن تنصروا الله ينصركم.
*أها.
*نجي لى شمارات والي الخرتوم.
*والينا
*بطاطين ما بتدفينا.
*الأمان هو الدفء عندينا.
*في حضن الوطن نتلما.
*نتجما.
*بحب يكفينا وأمن يدفينا.

سلك كهربا:
ننساك كيف والكلب قال كان قاعد معانا وقلبك ما معانا، يبقي قعادك شين شديد يا جراداي.

وإلى لقاء.

سلك.