هل سكت الرباب؟
بابكر سلك
*سبعطاشر يناير يوم لا يفارق ذاكرة الحسرة السودانية.
*يومٌ انتقل فيه مصطفى سيد أحمد، وبقي في وجدان الغناء السوداني عم عبدالرحيم، ليحكي لنا حرية الحرف وجدلية الكلمة وانسانية المنهج.
*وفي نفس التاريخ رحل حوت الغناء السوداني.
*الراستا.
*شيخ الحواتة.
*ولما أقول شيخ بقصد كدة.
*لأني شاهدت وعايشت بعض ما قام به الحوت تجاه أفراد وأسر في الضراء.
*لم يقم بربعه رجال البر الذين يبرون الناس تحت فلاشات الكاميرات، طمعًا في سلطة أو تصديق أو تلميع.
*شغل تجارة يعني.
*هل سمعتم مدحة محمود خدام الرسول؟
*عليكم الرسول اسمعوها وشاهدوا الكليب.
*بالتأكيد ستصلون لعضوية حيران الشيخ الحووووت.
*محمود ومصطفى لم يقتصر من يسمعونهم على طبقة معينة.
*كانوا من كل الطبقات.
*لأن الكلمات كانت تخاطب وعيًا.
*والوعي لا يحتاج لقناطير مقنطرة حتى تمارسه وتتمتع به وتستمتع.
*لذا كان معجبيهما من العامة والهامة المهتمة بالإنسانية والوعي والثقافة وحرية الحرف.
*فعندما يكون الحرف حرًا.
*ترفرف الكلمات في فضاءات الحقيقة بارتياح.
*وعندما يكون الحرف حرًا.
*تؤذن الكلمات أن حي على الفلاح.
*وعندما يكون الحرف حرًا.
*ترفرف الكلمات إذا الفجر لاح.
*وعندما يكون الحرف حرًا.
*تتجمل الحياة بالمباح في حدود المتاح.
*عشان كدة رحلا.
*ولسة يقيمان معانا
*أيها الناس.
*مطار الخرطوم هو دائمًا شاهد الحق على عظمة الرجال والمواقف.
*ما حدث بمطار الخرطوم يوم وصول جثمان محمود.
*لم يحدث إلا عند وصول جثمان مصطفى.
*وده قصتو قصة.
*قدر ما تتغير مواعيد الطائرة.
*حجم الناس ورغبة الناس وإصرار الناس لم يتغير.
*وما حدث عند وصول جثمان مصطفى.
*لم يحدث إلا عند عودة المريخ بمانديلا.
*وما حدث عند وصول المريخ بمانديلا.
*لم يحدث إلا عند وصول جمال عبد الناصر لها بعد النكبة.
*فكانت لاءات الخرطوم الثلاثة.
*العندو حدث عظيم وبشبه ديل.
*يورينا “كنيقدر”.
*ذكرى محمود ود ماما فايزة لن ننساها.
*فهو أخونا وعضو القطاع الثقافي بنادي المريخ.
*وذكرى مصطفى لن تبارحنا.
*فهو من علمنا سماع الحرف الحر.
*رحمهما الله وجعلهما في عليين.
*أها.
*المريخ الحاصل فيهو شنو؟؟؟
*إن نضمنا الخروج على الحاكم حرام.
*وإن سكتنا السكوت على موت المريخ حرام.
*نسوي شنو؟
*نطير؟
*نبقى نحنا مع الطيور الما بتعرف ليها خرطة ولا في إيدها جواز سفر؟؟؟
*أيها الناس.
*يا من تستعبدون الحرف.
*وتبيعونه رقيقًا في سوق النخاسة.
*مهلًا.
*الحرف ما للبيع.
*دعوا الحروف حرة.
*لنعش صدقًا فارقناه طويلًا.
*أيها الناس.
*الكضب حرام والقبر قدام.
*أيها الناس.
*إن تنصروا الله ينصركم.
*أها.
*نجي لي شمارات والي الخرتوم.
*كان شفت يا والينا.
*شوية مصداقية من بعضينا
*بتكشف مين الوطن ومين الإضينة.
سلك كهربا:
ننساك كيف والكلب قال أي زول باع قلموا تاني إلا يكتب بأصبعو في الواطة.
وإلى لقاء.
سلك.
