مازيمبي تاني قام على جِنّو

بابكر سلك

*كالعادة يا سادة.
*انهزم المريخ في الدوري الموريتاني.
*عادي.
*غلبتنا الجاية متين ما عارف.
*ما شفت جدول الدوري الموريتاني.
*لكنها مؤكدة.
*أي خسارتنا في الدوري الموريتاني
*ما حا نتكلم عن الأسباب.
*لأنو اتكلمنا كتير.
*ولأنو ما في زول ما عارف الأسباب.
*راعي الضان في خلا موريتانيا عارف الأسباب.
*أي عزبة في سوق المطلقات عارفة الأسباب.
*حتى من ينكر أن الأسباب هي الأسباب.
*إلا أنه تحت تحت مقتنع بأنها الأسباب.
*الآن شايف المجلس ينشط لإنقاذ ما يمكن إنقاذه.
*جهاز فني أجنبي.
*محترفين أصحاب مستويات محترمة “حسب ما قالوا لينا”.
*السعي لضم خامات بقيمة الشعار.
*وحاجات زي دي.
*نسأل الله التوفيق.
*ونسأله أن يمدنا بالصبر الجميل على هزائمنا في الدوري الموريتاني.
*ودي في حد ذاتها ما واجعاني.
*الواجعني نتذيل.
*وبالتالي نهبط.
*ويقوم اتحادنا يلقاها فرصة ويتمسك بالهبوط.
*على أساس إننا كنا نستحق الهبوط بحسب آخر دوري شاركنا فيهو.
*يا ربي طول تاريخ المريخ.
*من كان اسمو المسالمة.
*من كانت الكورة اسمها التيوة.
*هل خسر المريخ أربعة مباريات متتالية؟؟؟
*أيها الناس.
*في عهد مَن مِن الخلفاء الراشدين أُوقِف حد السرقة؟؟؟
*أسي ده كلام شنو وعلاقتو بالموضوع شنو؟
*ما علينا.
*هل ولا ما هل؟؟؟
*الليييييلة.
*الأهلي جا التاني.
*الليلة والليلة الباص أبو رجيلة.
*غايتو الشقي في الكبدة يلقى العضم.
*العضم هين.
*شفتوا مازيمبي تاني قام على جنو؟؟؟
*مازيمبي ده كلما نقول كبر وعقل.
*يقوم على جنو.
*الله لا عقلو.
*بس يقعد مجنون كدة.
*ويطقع.
*هو طقِع نصاح.
*ما بجلي.
*موش في مجانين بجدعوا الحجار في الشارع ساي.
*مازيمبي ده لما جنو يقوم عليهو بوزن تماااااام.
*وكع.
*في نص الراس.
*قبل تقش الدم.
*كع.
*بديك التانية.
*وكان أداك التانية.
*ليبيا بتفتح.
*ودمك بيهدر.
*وأحلامك الكانت معشعشة جوة راسك.
*تتبخر.
*وتظل الأميرة السمراء تقدل وتتبختر.
*أسي الجاب الأميرة السمراء مع كلام الجن ده شنو؟؟؟
*لكن قالوا أشهر أغنية في لوبومباشي معقل المجانين.
*هي أغنية شقي ومجنون.
*هو كان ما شقي بطير.
*وكان ما مجنون طيش مجموعة يغلب بطل مجموعة أربعة!
*مجنون هو ولا مجنون بطل مجموعة صافي أهدافو ماينص؟؟؟
*مجنون زول الماينص ده ولا مجنون الأهلي القاهري البجي التاني مخصوص؟؟؟
*مجنون الأهلي ولا مجنون سوليناس؟
*الجن بتداوى.
*وفي جن ما بتداوى.
*زي جن مازيمبي ده.
*أيها الناس
*إن تنصروا الله ينصركم.
*أها.
*نجي لى شمارات والي الخرتوم
*كان شفت يا والينا.
*تاني الجن قام علينا.
*أرقينا يا والينا.

سلك كهربا:
ننساك كيف والكلب قال حالة تخلي العاقل يطقع والمجنون يهبش.

وإلى لقاء.

سلك.