بابكر سلك
*الدنيا كلها بقت بدع
*لكن ما في بدعة بتجي ساي
*لازم وراها يكون في سبب او هدف
*تلاحظ في الآونة الاخيرة انو بعض العروسات بقن يجيبن شيلتن من حر مالهن ويدوها للعريس يقولوا ليهو خلي اهلك يجيبوها لينا
*طبعا العرس بالفاتحة حلال ما قلنا شي
*يعني العدمان من حقو يتزوج
*العدم ما عيب
*الدنيا ارزاق
*طب ليه العروس بتشتري الشيلة بي حقها وتقول للعريس خلي اهلك يجيبوها لينا؟؟؟
*قبيل قلنا اي بدعة وراها سبب
*السبب هنا ماهو الذي يتبادر للذهن بانو هو بوبار وقشرة
*السبب بكون في العروس الاشترت الشيلة ذاااتها
*بتكون مقتنعة انها مامؤهلة للعرس
*لذا بتقوم باغراء اي ضحية وتغريهو بالشيلة وما الي ذلك
*طيب عرفنا السبب… الهدف شنو؟؟؟
*الهدف بالتأكيد هو خروج العروس من البورة التي جعلت نصيبها في الزواج صفريا وهي في العمر ده
*المهم
*عرسان كتااار بشيلوا الشيلة ويعملوا (ياااااع)
*وفي واحدين بنقصوها ويشفشفوا معظم الدهب لانهم مقتنعين بانو الشغل قايم ولو بعد حين
*وحكاية العروس البتجيب شيلتها من مالها (سرا) وتديها للعريس انتقلت لبعض الاندية صفرية القسمة في الزواج من بطولة تخرج بها من بورتها
*المقلب الاكبر بكون لما العريس بشيل الشيلة ويعرس بيها واحدة تانية
*والغربية القصة دي حصلت رياضيا برضو
*ففي سيكافا الاخيرة
*عروسنا وبايرتنا العجوز
*شافت انها حاتعرس المرة دي
*قامت رفضت الشيلة المقترحة التي احضرها اهل العريس في سيكافا
*وقالت مابتتسمي بيها
*بل مشت اشترت شيلتها براها وسلمتها لاتحاد سيكافا عشان يجيبوها ليها عند اهلها
*باقي ربع ساعة والشيلة تصبح من نصيب العروسة امام اعين الناس
*وعينك ماتشوف الا النور
*العريس عمل (يااااااااااع)
*واتزوج من بنات الجيش الرواندي
*خلي عروسنا ريحتها جاز جاز
*عشان ماتستغرب لما بايرة تقول(نحنا لو بنعرس كشا مشا كان جنانا مشي)
*كلام البورة ده ياهو ذاتو المسمي سيكافا بطولة مجاعة ومانديلا ناكرنوا حطب
*وتبقي الحقيقة
*العروس البتشتري شيلتها من قروشها بتكون معترفة ببورتها وفوات الفرصة وعدم امكانية رحولها لبيت العدل (الجوي)
*وبعد ده ومع التطوى العلمي ده لو ختوا ليها (الجنة) جوة بطنها مابتلد
*عشان كدة تلقي البايرات بفكرن في التبني
*مهما كلفن من جاز
*ويتباهن بالطفل البتبننو وهن عالمات انه ليس بطفلهن
*يجيبوهوا من موريتانيا
*يجيبوهوا من رواندا
*مامهم
*المهم ظهورهن بمظهر المابايرات الامهات
*وهن يعلمن جيدا انه ليس كذلك
*وان الموضوع كلو تبني
*ويصدح المغني
*انا انا في التمني وديمة حبيبي غايب
*آآآآه
*لما يصلن لحتت امشي واجيهو راجع يلقن الواطة صبحت والشافع نقش الحقيقة
*قال نسجلوا في جينيس
*كدي سجلوهوا في الاحصاء اول
*المهم
*ريحة الجاز فايحة في رواندا
*الامر الذي يفرض علينا اعادة رديفنا بسرعة
*مع شكر اتحاد الجاز الرواندي علي الاستضافة
*والاعتذار عن المباراتين المتبقيتين
*لاني شامي ريحة تبني
*اصلو البايرة تبحث عن تبني انجاز جديد
*فلاتعطوها الفرصة
*شيلي شيلتك وارجعي اهلك
*ايها الناس
*هل ممكن نقوم بصيانة الاستاد للدرجة التي تؤهله لاستقبال التمارين والمباريات المحلية
*مع الشروع في تأسيس مدينة رياضية مواكبة تتوالي الاجيال في اكمالها؟
*هل ولا ماهل؟
*لانو القيمة التاريخية للاستاد في موقعه الحالي لاتقدر بثمن
*لذا يكون الترميم والاصلاح افيد بكتير من الازالة
*معقولة نزيل التاريخ بجرة قلم؟؟..
*نشتري القطعة في اطراف ام درمان مية فدان
*نعد الخرط
*استاد ملاعب صالات اولمبية احواض سباحة فنادق نادي اسري اماكن ترفيه
*نعمل الاساسات ونترك الباقي لجيل بعدنا
*يقوم الجيل البعدنا يعمل مايستطع عمله ويترك النهايات للجيل البعدو
*وتكتمل اللوحة
*ويبقي الاستاد القديم مثل القصر الجمهوري والمتحف القومي
*هل ولا ماهل يا اخوي ياسهل؟
*ايها الناس
*ان تنصروا الله ينصركم
*اها
*نجي لي شمارات والي الخرتوم
*تعرف يا والينا
*حضن الوطن ممكن كلنا يأوينا
*اذا اقتنعنا باننا واحد في اللينا والعلينا
سلك كهربا
ننساك كيف والكلب قال لو شلتوا سؤال قبيلتك شنو من تحريات الرقم الوطني بتتفقوا
والي لقاء
سلك
