بابكر سلك
*المشكلة ليست في خسارة الرديف للمباراة برواندا
*المشكلة انو (الرديف) لم يقدم مايفيد بانه منسجم وجاهز
*ومن هنا يأتي تفسير تأخير اتحاد (الجاز الرواندي) لتحديد موعد القمة وهو يعلم سلفا متي يبدأ دوري (اللخمة) بالسودان
*وهنا تبدو قضية
*وهنا رأي الدين صريح
*ان بعض الظن اثم
*ولكن اليقين قد يأتي ببينات ظرفية تبدأ تؤكده
*وريحة الجاز فواحة ومابتندس
*وطالما طال الجاز الاتحاد الرواندي
*يبقي علينا ان نفشل حفلات الجاز ونتمسك بالحقيبة
*ماهي عقوبة انسحابنا من متبقي الدوري الرواندي؟؟؟
*اسألني دبل
*طالما الروانديون (ماسكين جاز) نحنا مفروض مانقطع الزلط عشان مايودونا في داهية
*والاسباب راااقدة
*اقلها الظلم التحكيمي الذي انهال علينا بقوة مع توجيهه لصالح ماكينات الجاز التي عشقها الروانديون
*تأجيلات وتحكيم لازي منو وتأجيلات وتغيير ملاعب وهلمجرا
*حتي في بث المباريات كان في جاز وفقوس
*فرقة الجاز تريد ان تقيم بنا حفلة برواندا
*لهم فيها سبعة عازفين اجانب وارد اتحادنا
*ولهم فيها اكثر من مثلهم من الوطنيون اصحاب الخبرات
*ونحنا نمشي بالرديف الخفيف
*لماذا؟
*لان ناس فرقة الجاز بعجبهم رقصينا
*يا مجلسنا
*شيل ليك وفرتق الحفلة
*رقيص نهي بالكل
*اكسر ليهم الدش في ايدهم خلي الجاز يتكشح
*فناس فرقة الجاز لازالت تؤلمهم اغنيتين بتاعت الحقيبة الرقصناهم بها (بالرقبة)
*وكايسين للثأر والتار والانتقام
*لكن يادفترجاز
*دفترجاز دي جاية من دفتردار
*لكن يادفترجاز شوف ليك ناس داقسين وجه حملاتك الانتقامية ليهم
*نحنا؟
*منو دي؟؟؟؟
*انا دي؟؟؟؟
*تلقاها عند الغافل
*نجيب رديفنا البلد فورا
*عشان يحضر حفلة الحقيبة الماخمج
*اغنية هاسينا (الحابينا) مابتتفوت
*جيبوا الرديف وخلوهم يلعبوا ليدو
*البفوز يغني
*البابور جاز خلو الاشتقل الشقل بالجاز
*عشنا وشفنا
*الشغل بالجاز كان اغنية بقي واقع
*امسك جاز يازول
*وبي جازك
*ايها الناس
*توج لامين انداي مع اتحاد الجزائر بالكونفدرالية
*واتحاد الجزائر معاهو تيندينغ
*الزول الابي الجاز ومشي محل الانجاز
*الزول ده عرفها
*داير انجاز
*البقعدو في محل الجاز شنو؟؟؟
*وطفش وحقق الانجاز
*والغريبة نداي ماغريبة عليهو البطولة
*خسرها بس ايام قعادو مع ناس البلولة راجيين اغاني الجاز
*قلت لي (متعلقين) فوق امل؟
*اصلو الغرقان بعمل عليقي في قشة
*واتعلقي
*ولا ماكدة ياروشا يا اخوي؟؟؟؟؟
*ايها الناس
*قصة نلعب بالرديف دي اسمها نلعب باسمنا
*عشان كدة مابتحصل
*يعني انتوا دايرننا نتدق ونبكي ونقول اصبر لي بجيب ليك القدرك؟؟؟
*ايها الناس
*ان تنصروا الله ينصركم
*فردا فردا بنصركم
*اها
*نجي لي شمارات والي الخرتوم
*والينا
*فضلت حتة في حضن الوطن لينا؟؟؟
*ولا نمشي نشوف حاضنة تأوينا؟؟؟؟؟
سلك كهربا
ننساك كيف والكلب قال لو اقتنعتوا انكم شعب واحد ما شعوب جوة وطن واحد وفتحتوا صفحة تسامح حقيقي زي بتاع رواندا…. سنتين بس رواندا ذاتها ما بتلحقكم…..
والي لقاء
سلك
