في السلك
*طبعًا من غير المنطقي أن نطمح ونطمع في اصلاح خراب ممنهج استمر سنينا عددا في زمن وجيز
*واذا حصل اكيد الإصلاح بكون غير مؤسس
*وبكون عدي من وشك ساي
*ووقتها لن نتفاجأ بسقوط البناء علي رؤوسنا
*فريق الكرة المريخي تعرض للتخريب الممنهج منذ سنوات مضت
*سواء كان ذلك الخراب باهمال الصيانة وعدم توفير قطع الغيار المناسبة والاصلية
*اشتغلنا توليف
*شمبر الداتسون بشتغل في بستم الكرونا
*وهكذا
*ووصلنا لدرجة نفك قطعة الغيار من عربيتنا
*تكون سمحة وشغالة
*ونولف واحدة ما اصلية مكانها
*عشان كدة البوهية قبل اتمام السمكرة مابتفيد
*ومسيح البودي بالمعجون زي مسيح الرجلين بالطين ماببقي لينا نعلين
*واستارتر الاتوز مابدور البرادو
*اللتيق ماحبابو
*اصلو البقت بقت
*وحكت (بكسر الحاء)
*وقضينا تلك السنين الغابرة
*مابين سندان التدهور ومطرقة التهور
*والآن يانصبر يا يستمر الحال
*عربيتنا دي دايرة مراجعة مسمار مسمار
*بس ابعدوا السمسار
*عشان مايبقي اساسي في جلب الاسبيرات المحتاجين ليها
*وهناك اسباب كتيرة قادتنا لهذه المرحلة
*السبب الاول (قادتنا) ذاتهم
*لانهم بعتمدوا علي اركان حرب (متعاونين) ويقربوهم منهم وبالتالي من القرار فيتم شطب بكري المدينة ونحن علي اعتاب المجموعات لياتونا ببرازيلي في عمره دفعة عمك عبدالقادر المدينة
*تلاتة برازيليين وشقة طارت
*قول شقتين
*اما السبب التاني وهو الذي ينافس السبب الاول علي المركز الاول
*هو النرجسية ومحاولات فرض الوصايا علي شعب المريخ
*ثم تسيير المجالس ولجان التسيير بالرموت كنترول الممسك به يكون خارج المشهد المعروض علي الشاشة
*هذا الرموت خلق (سواقين ) خلا وتجار اعضاء
*اقصد تجار عضوية لا تسوق بضاعتهم الا في ظل كيمان واختلاف وعراك
*فكان الخلاف بين افراد الشعب المريخي هو الذي يجب ان يتجذر في مجتمع المريخ
*وتجذر
*تجذر لدرجة ان مجرد المطالبة بوفاق او اتفاق يزيل اللبس ويكون قاعدة صلبة لحل النزاع القانوني القائم (في ناس مامعترفين بيهو) او يقرب وجهات النظر ليقضي علي التشظي والانقسام والكيمان
*يكون كفيلا بتصنيفك (متعاون)
*لا لشئ سوي ان اسماكهم لاتستطيع العيش الا وهي تسبح في دموع الشرفاء حزنا علي الكيان
*المشكلة لا في شداد ولا في الاتحاد ولا في اسامة ولا في قرعة افريقيا
*المشكلة فينا نحنا ديل
*ايها الناس
*يا نبطل تصنيف يانجلس لسة علي الرصيف
*المهم
*سمعتوا بقصة بغلة عبدالخير؟
*طيب فيكم زول شاف بغلة عبدالخير؟؟؟
*طيب فيكم زول بعرف عبدالخير؟؟؟
*ما حا احكي ليكم قصتها
*الداير يشوف بغلة عبدالخير يشترك في البي ان سبورت
*حايشوفها وحايعرف قصتها
*صبرا جميلا
*بس وصية
*البحضر يحضر بامبرز عشان عمايل بغلة عبدالخير قد تتعدي حدود الشاشة
*ايها الناس
*ان تنصروا الله ينصركم
*اها
*نجي لي شمارات والي الخرتوم
*تعرف يا والينا
*كل الدنيا ماواقعة لينا
*دايرين نتلم في بلدا لينا
*وخسران البتدفن بره يا والينا
سلك كهربا
ننساك كيف والكلب قال قون بالضهر ده قون ولا فليتة؟
وإلى لقاء
سلك
