بابكر سلك
لجنة التسيير عند تعيينها تم وضع مهام محددة عليها إنجازها خلال الشهرين، بحسب النظام الأساسي الذي بموجبه تم تعيينها.
ولكن الواقع يقول بأن مهام لجنة التسيير الموكلة لها أكثر من ذلك بكثير.
بل قد تفوق مهام مجلس منتخب عمره أربعة سنين.
إعادة تأهيل فريق الكرة.
إعادة تأهيل الاستاد والمنشآت.
خلق استقرار بالنادي افتقده سنينًا عددًا.
حل الديون وقفل أبواب الفيفا.
العمل على لمّ شمل جمع المريخاب ومحاربة التعصب للكيانات والتحزّب.
إعادة هيبة النادي، بالذات أمام قمم هيئات الرياضة.
فرض هيبة النادي داخليًا بالنسبة للاعبين وللذين اعتادوا التدخل في الشأن الإداري من منازلهم.
ولسّه.
المهام كتيرة.
لو كتبناها كلها فإن الشهرين عمر لجنة التسيير لا يكفينا للكتابة.
ثم نُجدِّد شهرين لنُجدِّد بعدهما شهرين.
ده ذاتو عدم استقرار للعمل.
فحقّو الناس تكون واضحة.
وتبحث عن وسيلة تدعم تكليف لجنة التسيير لأطول مدة ممكنة.
فهي الآن تعمل بطريقة شافع المدرسة.
يصحّوه الصباح: قوم قوم.
الترحيل جا.
وقبل ما يتسوّك كويس يسرّحوه، وقبل ما يسرّحوه كويس يلبّسوه، وقبل ما يلبّسوه كويس يدّوه الشاي، وقبل ما يشرب يشيلوه الشنطة واللنش بوكس ويمرقوه للترحيل.
يصل المدرسة ما فاهم أيّ حاجة ومشتّت التفكير.
يرجع البيت يبدأ اللوم.
وسّخت هدومك كده بشنو؟ تعال اطفح الغدا… ما في حاجة اسمها ما داير أسي… وقبل ما يتغدّى كويس قوم جيب شنطتك.
داير ألعب.
لا، ما في لعب.
اقعد هنا.
ستة ناقص خمسة كم؟
طاخ.
لأنك ما خاتي بالك.
البلد بلد منو؟
بلد البنت والولد.
طاخ.
البنت والولد يا بليد.
حصل لاقتك بلد حقت بنت وولد؟
قوم نوم.
ما داير أنوم أسي.
ما علي كيفك، الترحيل بجي بدري.
وقبل ما ينوم كويس:
قوم قوم، الترحيل قرب يجي.
حال الشافع ده هو حال لجنة التسيير في العمل.
زمن تعمل فيهو حاجة بمزاجها ما في.
قوم قوم، الشهرين تمّت والترحيل جا.
عشان كده أرى أن نبحث عن آلية تبيح للجان العدلية تحديد الأمد المناسب والمريح للجنة التسيير.
لأنو نفسها قام.
وقوم قوم، الترحيل جا.
دي بتور نفسها زيادة.
أيها الناس،
لجنة التسيير لا تحتاج لخط دفاع يستميت من أجلها.
ولا أعتقد أن هجمات الآخرين ممكن تعيق مسيرتها.
عشان كده حقّو الناس توفّر تلجها.
والناس الأخرى تلمّلم عصيّها.
فالمرحلة لا تحتاج حربًا، ولا تستفيد من تلجٍ مكسّرٍ على قارعة الميديا.
المهم،
يا لجنة التسيير،
الترحيل ما جا.
قوموا لعملكم، يرحمكم الله.
أيها الناس،
إن تنصروا الله ينصركم.
اها،
نجي لي شمّارات والي الخرطوم.
كان شفت يا والينا،
البلد دي ما في شي طلع عينّا،
غير كسير التلج يا والينا.
سلك كهربا
ننساك كيف، والكلب قال: البكسر ليك تلج داير الحساب… أو بردمك بنفس التلج.
وإلى لقاء.
