بابكر سلك
*تطورت كرة القدم من حيث الخطط وطرق اللعب
*فالجناح لم يعد دوره مقتصرا فقط علي مراوغة الباك وتخطيه و عمل العكسيات
*والثيرباك لم يعد ذلك (الزول) الضخم العنيف الذي يردم زميلو ذاتو لو جا جمبو
*ولاعب المحور تغير من زول ببووظ كورة الخصم لاهم خانة في الملعب تصنع اللعب وتوازن التيم علي ارض الملعب
*حتي الحارس بقي يبدأ الهجمة والتمرير واللعب بالقدم مع الاجادة
*واشكال كتيرة تعبر عن تطور مفاهيم الاداء في كرة القدم
*زمان اذا الخصم اتكتل ليك مدافعا
*مابخارجك الا لاعب مهاري صاحب خيال واسع يضرب ذلك التكتل في مقتل
*وعلي ذكر هذا اذكر مباراة للمريخ ضد شمبات باستاد المريخ
*شمبات كانت تتلتل
*وجات مخندقة
*خندقة جد
*مع اجادة مصيدة التسلل
*واستمرت المباراة صفرية حتي الربع ساعة الاخير
*ابراهومة الديسكو
*جاتو الكورة
*لعب باص خلف دفاع شمبات
*الشمباته وقفوا نصبا لمصيدة التسلل التي برعوا فيها
*بس باص ابراهومة ماكان لي زول
*كان لي روحو دي
*لعب الباص
*دفاع الخصم وقف
*اتحرك هو ولحق الكورة وختاها هدفا اول ووحيد كفل للزعيم النقاط
*العملو ابراهومة ده اسمو نجاعة وخيال واسع وشفتنه ومهارة
*جهازنا الفني وقتها فشل في وضع طريقة يضرب بها تكتل شمبات
*لكن موهبة ابراهومة نجحت في كسر التكتل
*وبرغم تطور طرق لعب كرة القدم وتغيير الكتير من مهام الخانات
*الا ان أى فريق يحتاج للاعب مهاري خيالو واسع
*اسي يامال ده مهارتو مابتجهجه اعتي الدفاعات؟
*إذن برغم التطور إلا أن كرة القدم لازالت تعتمد علي المدرب الشاطر الذي يخلق طرقًا للعب تنتج عنها أهدافًا غزيرة
*ولا زالت واعني كرة القدم
*لازالت تحتاج للاعب المهاري صاحب الخيال الواسع
*فهو الذي، ياتي باشياء حتي المدرب ذاتو مابكون فكر فيها
*المهم
*الكلام ده كولو عشان تعادلنا الاخير ده
*فشلنا في كسر خندقة المنافس
*دي حقيقة
*ولكن السؤال
*ماهو سبب الفشل؟؟؟
*هل داركو هو السبب لأنه فشل في ايجاد طريقة يضرب بها الخطط الدفاعية؟
*ام سبب الفشل ان منطقة صناعة اللعب بالمريخ تفتقد للاعب المهاري الخيالي، الشفت صاحب الحلول الفردية؟؟؟.
*ماداير اسأل عن نجاعة المهاجمين
*لانو ماجاتنا فرص اضاعها المهاجمون
*القصة كلها في صناعة اللعب
*سواء كانت طريقة مدرب او مهارة لاعب وخيال فنان
*ايها الناس
*عشرة درونات كتيرة
*وياريت لو كان فيها اهدافا ضائعة او كور دقت في الحديدة
*يبقي بي روقة
*نراجع امر صناعة اللعب برااااااحة
*طريقة مدرب ونجاعة لاعب
*ونشيل الصبر
*اخير من نشيل داركو
*ولا شنو؟؟؟؟؟
*لكن كمان في حاجات لازم تتقال
*توظيف اللاعبين واكتشاف مهاراتهم في مهام وخانات جديدة
*ده شغل مدرب
*فالراحل سيد سليم اعاد عاطف القوز لخانة الطرف الشمال مدافعا
*عاطف كان جناح مهاجم
*وكان مرشح للشطب كمان
*ابو السيد وظفو في وظيفة جديدة بقي نجم كبير
*شغل مدرب
*وزولفاني (المغمور) وظف بكري المدينة في خانة صانع اللعب
*خلق منو مكنة اسست نجمت الغربال وتوجته هدافا لبطولة العرب
*وجون ماننق الذي، اتي بالسر زغبير من خانة قلب الدفاع لرأس حربة
*توجت زغبير هدافا للدوري من الدورة التانية بس
*ورودر الذي يشرك دحدوح الاشول في خانة الجناح اليمين خلق منه هدافا لايشق له غبار
*بالمناسبة طريفة لعب يامال وتوظيفه هي نفسها الطريقة الرودرية الدحدوحية
*وغرزة صنع من علاء الدين لاعب المحور اشرس استوبر
*وتعال شوف كم مدرب وظف احمد الباشا في خانة جديدة؟؟؟
*وهل نسينا رودر الذي يشرك باكمبا طرفا يسار تارة ويجيد
*ثم يشركه محورا ويجيد
*ثم يشركه صانع العاب ويجيد
*ليشركه جناح ويجيد ايضا
*كل ذلك قراءة مدربين ادركو ياداركو امكانيات لاعبيهم فوظفوهم بحسب الحاجة وبحسب حوجة طريقة اللعب
*المهم
*داركو الذي تسلم فريق عبارة عن اطلال
*اعتقد انه افلح حتي هذه اللحظة
*علي الاقل في التنظيم الدفاعي
*بس ياداركو نحنا اتربينا علي ان انجع وسيلة للدفاع هي الهجوم
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*مهما طالت غربتنا
*بلدنا حنينة
*ومهما حلكت ضلمتنا
*عشمنا رتينة
*فانوس يتوسطنا يضوي لينا
*بس يكون في أمان يامان عشان الهوا مايطفي فانوسنا والرتينة
سلك كهربا
ننساك كيف والكلب قال كان سكتنا يشفشفونا وكان نبحنا يقولوا جنوا
وإلى لقاء
سلك
